هێزێکی سەربازی لە عێراق بۆ پشتیوانیی لە لوبنان پێکدەهێنرێت

ئاڤا نیوز

 

بۆ یارمەتیدانی لوبنان لە دژی ئیسرائیل و بەشداریی ڕاستەوخۆ لە شەڕدا، بزووتنەوەی جیهاد و بینا لە عێراق لیوایەک پێکدەهێنێت و دەرگای خۆ تۆمارکردنیان کردووەتەوە. 

 

وێنە گەورەکە: لە سەرەتای جەنگی نێوان حیزبوڵڵای لوبنان و ئیسرائیل، ژمارەیەک لە گرووپە چەکدارییەکانی عێراق پشتیوانی خۆیان بۆ حیزبووڵڵا ڕاگەیاندووە و ئامادەی بەشداری شەڕی ڕاستەوخۆیان دەربڕیوە بۆ بەرگریکردن لە لوبنان. 

 

ڕاگەیێنراوی فەرمی: بزووتنەوەی جیهاد و بینا لە بەیاننامەکەیدا ڕایگەیاندووە: "ئیسرائیل بەشێوەیەکی دڕندانە گەلی لوبنانی بە ئامانج گرتووە و بە سەدان کەس بوونەتە قوربانی و بە هەزاران هاووڵاتیش ئاوارەبوون، مەرجەعیەتیش هاوسۆزی خۆی بۆ گەلی لوبنان دەردەبڕێت و سەرەخۆشی لە کەسوکاری قوربانیان دەکات".

 

ئەوەی پێویستە بیزانیت: عەلی سیستانی مەرجەعی باڵای شیعەکانی عێراق،داوای کردبوو هەموو هەوڵێک بدرێت بۆ ڕاگرتنی دەستدرێژی سەر لوبنان و داوای لە باوەڕدارنیش کرد کە پێداویستییە مرۆییەکان بگەیەنە ئەو وڵاتە.