بەهۆی کوژرانی حەسەن نەسروڵڵا لە هەشت پارێزگای عێراق پشووە

ئاڤا نیوز

 

بەشێک لە پارێزگاکانی عێراق بۆ هاوسۆزی کوژرانی حەسەن نەسروڵڵا، ئەمڕۆ یەکشەممەیان کردە پشوو، هاوکات لە بەشێک لە پارێزگاکانی دیکە خۆپیشاندانی جەماوەری دژی بەئامانجگرتنی ئەو سەرکردەیە بەڕێوەچوو.

 

وێنە گەورەکە: ئێوارەی ڕۆژی هەینی 27-9- 2024، سوپای ئیسرائیل بە ئامانجی کوشتنی حەسەن نەسروڵڵا، ئەمینداری حیزبوڵڵا زنجیرەیەک هێرشی کردە سەر بەیرووت، ڕۆژێک دوای هێرشەکان سوپای ئیسرائیل لە ڕێگەیێندراوێکدا هەواڵی کوشتی نەسروڵڵای بڵاوکردەوە و دوای چەند کاتژمیرێکیش حیزبوڵڵا هەواڵەکەی پشتڕاستکردەوە.

 

بڵاوکراوەی فەرمی: ڕۆژی شەممە 28-09-2024، پارێزگاکانی نەجەف، کەربەلا، بابل، میسان، دیوانیە، موسەننا، دیالە و زیقار ئەمڕۆ یەکشەممەیان لە دامودەزگا فەرمییەکانی پارێزگاکانیان کردە پشوو.

 

ئەوەی پێویستە بیزانیت: شەوی ڕابردوو بە سەدان هاووڵاتی لە بەغدا دژی کوشتنی حەسەن نەسروڵڵا بە گوتنەوەی چەندین دروشمی بەرەی مقاوەمە و بەرزکردنەوەی ئاڵای فەڵەستین و لوبنان،  وێنەکانی حەسەن نەسروڵڵا، قاسم سولەیمانی و ئەبو مەهدی موهەندیس ڕژانە سەرشەقامەکان، هاوکات لە چەندین پارێزگای دیکەی عێراقیش هاووڵاتیان خۆپیشاندانیان کرد.

 

ئەمەش بزانە: ڕۆژی شەممە بەهەمان هۆکار حکومەتی عێراق سێ ڕۆژ ماتەمینی لە سەرتاسەری عێراق ڕاگەیاند.