هاککردنی دامودەزگاکان هەڕەشە لە داهاتووی عێراق دەکات

ئاڤا نیوز

 

چەندین ساڵە عێراق بەدەست هاککردن و دزرانی دەیان داتا و زانیاریییەوە دەناڵێنێت، چەندین دامودەزگا، کۆمپانیا و بانکی وڵاتەکە بوونەتە ئامانجی هێرشە ئەلیکترۆنییەکان.

 

لێدوانی فەرمی: سەرکەوت شابان، شارەزا لە ئاسایشی ئینتەرنێت بە ئاڤا نیوزی ڕاگەیاند: "گەورەترین شەڕی نێوان وڵاتانی جیهان لەسەر دەستگەیشتنە بە داتا و زانیارییەکانی خەڵک، واتا بتەوێت کاریگەریی لەسەر وڵاتێک دروست بکەیت، بە هاککردن و هەبوونی داتای خەڵکەکە، دەتوانرێت بە ناردنی نامە و پەیامی تایبەتەوە، گۆڕانکاریی لەسەر بیروڕا و ئایدۆلۆژیای کەسەکان بکرێت".

 

زانیاریی زیاتر: شارەزاکەی ئاسایشی ئینتەرنێت ئاماژەی بەوەشکرد: بابەتی خۆپارێزی لە ئینتەرنێت گرنگە، بەڵام هیچ خۆپارێزییەکی تەواوەتی لەسەر ئینتەرنێت بوونی نییە و هەرچەند پێگەیەکی تۆکمە هەبێت، دەکرێت گرووپێکی بەهێزتر بتوانێت ئەم خۆپارێزییە بشکێنێت و داواجار دەستی بەو زانیارییانە بگات کە مەبەستییەتی، هاوکات دەیان کۆمپانیای گەورەی جیهانی بە فرۆشتنەوەی داتا و زانیاریی خەڵکی وڵاتان بە وڵاتێکی دیکە، تۆمەتبار کراون.

 

لەلایەکی دیکەوە:  ئەو هێرشانە لە ڕێگەی گرووپی جیهانیی شارەزاوەوە ئەنجام دەدرێن، کە ڕێی تێدەچێت وڵاتی گەورەیان لە پشتەوە بێت.

 

پێدراوە ڕاستییەکان: مانگی ڕابردوو کۆمپانیای 'چێک پۆینت' بۆ ئاسایشی ئەلیکترۆنی ئیسرائیل شیکارییەکی لە ماڵپەڕی فەرمی خۆیدا بڵاوکردووەتەوە کە گرووپێکی ئێرانی ناسراو بە APT34، هێرشی ئەلیکترۆنی کردووەتە سەر دامودەزگاکانی عێراق و توانیویانە زانیاریی کەسیی و تایبەتی بدزن.