سوپای ئیسرائیل کوژرانی 15 چەکداری حیزبوڵڵای لوبنانی ڕاگەیاند

ئاڤا نیوز

 

سوپای ئیسرائیل لە هیرشێکیدا بۆ سەر باشووری لوبنان، کوژرانی 15 چەکداری سەر بە حیزبوڵڵای لوبنانی ڕاگەیاند و حیزبوڵڵاش دەڵێت، بەرهەڵستی هێرشەکەی ئیسرائیلیان کردووە. 

 

چیرۆکی سەرەکی: سوپای ئیسرائیل، هێرشێکی ئاسمانییان ئەنجامداوە و بەهۆیەوە 15 چەکداری حیزبوڵڵای لوبنان کوژراون و یەکێک لە پێگەکانی ئەو گروپەیان کردووەتە ئامانج، ئەم ئاڵۆزیانە لە کاتێکدایە سوپای ئیسرائیل هێرشی زەمینی سنوورداری لەناو خاکی لوبنان دەستپێکردووە. 

 

بڵاوکراوەی فەرمی: لە بەیاننامەیەکی سوپای ئیسرائیلدا هاتووە: هێزە ئاسمانییەکانمان پێگەیەکی حیزبوڵڵایان لە نزیک بینای شارەوانی بنت جبەیل کردووەتە ئامانج، کە حەشارگەیەکی هەڵگرتنی چەکبووە و 15 چەکداریشی تیادا کوژراوە.

 

لەلایەکی دیکەوە: لە ڕاگەیێندراوێکی حیزبوڵڵای لوبناندا هاتووە: هێزەکانمان هەوڵێکی سووپای ئیسرائیلیان بۆ پێشڕەوی شکست پێهێناوە لە دەروازەی فاتیمە، هاوکات ئاماژەی بە کوژرانی هەشت سەربازی ئیسرائیل داوە لە باشووری لوبنان لەمیانەی ڕووبەڕووبوونەوە سەربازییەکان.