پلاندانانی عێراق: سەرژمێریی دانیشتووان ڕێژەی ڕاستەقینەی بێکاری دەردەخات

ئاڤا نیوز

 

وەزارەتی پلاندانانی عێراق ڕایدەگەیێنێ، بەهۆی ئەو سەرژمێرییەی ئەمساڵ دەکرێت، دەتوانن ڕێژەی ڕاستەقینەی بێکاری و پەیوەندی منداڵان بە خوێندنەوە لە هەر گوند و شار و شارۆچکەیەکدا بزانن، ئەوەش بۆ پرۆسەی گەشەپێدان سوودی دەبێت.

 

وێنە گەورەكە: بڕیارە 20-11ی ئەمساڵ سەرژمێری گشتی دانیشتووان لە سەرتاسەری عێراق و هەرێمی کوردستان بکرێت، بۆ ئەم مەبەستەش هەموو ئامادەکارییەک کراوە.

 

لێدوانی فەرمی: مەهدی عەلاق، ڕاوێژکاری سندووقی نەتەوەیەکگرتووەکان بۆ دانیشتووان لە وەزارەتی پلاندانانی عێراق، بە ئاژانسی هەواڵی عێراق (واع)ـی ڕاگەیاند، 50%ـی پرۆسەی ژمارەدان لە خانوو و باڵەخانەکان و دیاریکردنی سنووری جوگرافی هەر ناوچەیەکی سەرژمێری لە پارێزگاکاندا تەواوبووە و ڕێکارەکان بەشێوەیەکی باش بەڕێوەدەچن.

 

بەگوتەی ئەو بەرپرسە، بەبێ بوونی ئاماری نوێ هیچ پلان و پرۆسەیەکی گەشەپێدان سەرکەوتوو نابێت، جەختیش دەکاتەوە کە ڕەنگە ئێستا هەندێک ئاماری گشتی هەبن، بەڵام سوودی سەرژمێری ئەوەیە کە پێوەر و ئامارەکان لە ئاستی بچووکترین پێکهاتەی ئیداریدا دیار دەبن، بەتایبەت زانینی تێکڕای پەیوەندیکردنی منداڵان بە خوێندن و ڕێژەی بێکاری.