ئاوارەکانی لوبنان بۆ ماوەیەکی درێژخایەن لە عێراق دەمێننەوە

ئاڤا نیوز

 

عێراق بەردەوامە لە پێشوازیکردن لە هەزاران ئاوارەی لوبنان کە بەهۆی شەڕ و نائارامییەکانی ئەو وڵاتەوە ڕوویان لە عێراق کردووە، بەگوێرەی ڕێکارەکانی حکومەتی فیدڕاڵیش هاتنی ئاوارەکان کاتی نییە و پێدەچێت بۆ ماوەیەکی درێژخایەن لە عێراق بمێننەوە.

 

وێنە گەورەکە: لەگەڵ دەستپێکی هێرشەکانی ئیسرائیل بۆسەر لوبنان، عێراق دەرگای بۆ لەخۆگرتنی ئاوارەکانی لوبنان کردەوە و تائێستا زیاتر لە 5000 هەزار ئاوارە گەیشتوونەتە عێراق و چاوەڕێش دەکرێت لە ڕۆژانی داهاتوودا ژمارەکە زیاتر بەرزببێتەوە.

 

زانیاریی بەدەستهاتوو: دەروون مەلا ناجی، پەیامنێری ئاڤا لە بەغدا ڕایگەیاند: تائێستا جگە لە هێڵی گەشتیاری ئاسمانی، چوار کاروانی ئاوارەکانی لوبنان لەڕێگەی دەروازەی قائیمی نێوان عێراق و سووریاشەوە هاتوونەتە بەغدا و دواتر بۆ نیشتەجێکردنیان ڕەوانەی هەردوو پارێزگای کەربەلا و نەجەف کراون، حکومەتی عێراقیش هۆکاری گواستنەوە و نیشتەجێکردنی بۆ هەموو ئاوارەکان دابینکردووە.

 

لەلایەکی دیکەوە: لەسەر بڕیاری سەرۆکوەزیرانی عێراق، ڕۆژی چوارشەممە وەزارەتی پەروەردەی عێراق بڕیاریدا دەرگای خوێندن بۆ منداڵانی ئاوارەکانی لوبنان بکاتەوە تا بتوانن درێژە بە خوێندن بدەن.