مەسرور بارزانی بۆ خەڵکی سلێمانی: لە هیچ کەس و لایەنێک مەترسن

ئاڤا نیوز

 

مەسرور بارزانی، جێگری سەرۆکی پارتی لەکاتی بانگەشەی حیزبەکە لە دهۆک پەیامێک ئاراستەی خەڵکی کودستان و سنووری سلێمانی بە تایبەت دەکات.

 

وێنە گەورەکە: سەرەڕای ئەوەی یەکێتی لەم هەڵبژاردنە بە زمانێکی زبر و تووند بانگەشە دەکات، لە سلێمانی و ناوچەکانی ژێر دەسەڵاتی "دەستی بە کامپەینی هەڕەشەکردن و ئاگادارکردنەوەی خەڵک کردووە کە دەبێت تەنیا دەنگ بە یەکێتی بدەن"، ئەمەش ترس و نیگەرانی لای خەڵک دروست کردووە.

 

لێدوانی فەرمی: مەسرور بارزانی، ئەمڕۆ یەکشەممە لە شاری دهۆک لەمیانی پێشکەشکردنی گوتارێکدا لە ئاهەنگێکی حیزبەکەی، پەیامێکی تایبەتی ئاراستەی خەڵکی سلێمانی و ناوچەکانی ژێر دەسەڵاتی یەکێتی کرد بەوەی لەکاتی دەنگدان نەترسن و گوتی: "لە هیچ کەسێک مەترسن، کەس خاوەنی ئێوە نییە، ئێوە گەلێکی ئازادن، خاوەنی شۆڕشی ئەیلوول و ئەم وڵاتە و بڕیارەکانتانن، هیچ دەسەڵاتێکی گەندەڵ ناتوانێت ڕێگەتان لێ بگرێت بۆ ئەوەی ببنە خاوەنی بڕیارەکانتان". 

 

لەلایەکی دیکەوە: مەسرور بارزانی داوای لە خەڵکی ئەو سنوورە کرد لەپێناو گەیشتنی دەستی ئاوەدانی و خزمەتگوزاری بە ناوچەکانیان دەنگ بە لیستی 190ی پارتی بدەن، بۆ ئەوەی چیتر دەستی خۆسەپێنی و  گەندەڵی و قاچاخی و بازرگانی نایاسایی لە هیچ شوێنێکی کوردستان بەردەوام نەبێت.