گەورەترین پڕۆژەی ئاژەڵداریی و بەرهەمە شیرەمەنییەکان لە دهۆک دەکرێتەوە

ئاڤا نیوز

 

سەرۆکوەزیران مەسرور بارزانی، پڕۆژەی کاڤین فارم لە سنووری قەزای سێمێل دەکاتەوە، کە تایبەتە بە ئاژەڵداریی و بەرهەمێنانی شیر، پەنیر و ماست.

 

وێنە گەورەکە: به‌دیهێنانی ئاسایشی خۆراک و زیادكردنی به‌رهه‌می كشتوكاڵی یه‌كێكه‌ له‌ پلانه‌ سه‌ره‌كییه‌كانی كابینه‌ی نۆیه‌می حكومه‌تی هه‌رێمی كوردستان به‌ ئامانجی هه‌مه‌ جۆركردنی سه‌رچاوه‌كانی داهات، ئه‌م پڕۆژه‌یه‌ دەبێتە گەورەترین پرۆژەی بەرهەمهێنانی شیرەمەنی لە هەرێمی كوردستان و عێراق، لەسەر ڕووبەری هەزار دۆنم زەوی و بە تێچووی 90 ملیۆن دۆلار بوونیادنراوە.

 

لێدوانی فەرمی: د.هەڤاڵ ئاکرەیی، بەڕێوەبەری گشتیی وەبەرهێنانی دهۆک بە ئاڤا نیوزی گوت: "ئەم پڕۆژەیە زیاتر لە 500 هەلیکاری ڕاستەوخۆ و سەدان هەلیکاری ناڕاستەوخۆ دابین دەکات، نزیکەی سێ هەزار مانگا لە ئەڵمانیاوە هاوردە دەکرێن و بێچووەکانیان بەخێو دەکرێن بۆ زیادکردنی بەرهەمی گۆشت، جگە لەوەش بەرهەمی شیرمەنی هەناردەی وڵاتانی دیکە دەکرێت."

 

زانیاریی زیاتر: کاڤین فارم 101ـەمین پرۆژه‌ی بەخێوكردن و قەڵەوكردنی گۆلكە لە هەرێمی کوردستان، بەرهەمی شیری پڕۆژەکە ڕۆژانە 120 هەزار لیتر شیر دەبێت، جگە لەوەش شیر لە هاونیشتمانییانی سنوورەکەش وەردەگرت، بە گشتی پڕۆژەکە ڕۆژانە توانای بەرهەمهێنانی 500 هەزار لیتر شیری هەیە.

 

خاڵی ستراتیژی: لە کاڤین فارم بۆ یەکەمین جار شیر بەبێ ماددەی پارێزەر ڕەوانەی بازاڕ دەکرێت و بۆ ماوەی شەش مانگ بەسەرناچێت، هەروەها بۆ یەکەم جار لەسەر ئاستی ناوچەکە شیر بە بەتامی میوە بەرهەم دەهێنێت، هاوکات 300 دۆنم زەوی لە نێو پڕۆژەی بە ئالیکی مانگا داچێنراوە.