لە هەرێمی کوردستان 84%ـی کارەبا بە وزەی پاک بەرهەمدەهێنرێت

ئاڤا نیوز

ئاستی بەرهەمهێنانی کارەبا لە هەرێمی کوردستان گەیشتووەتە چوار هەزار و 200 مێگاوات، لەو بڕەیەش 84%ـی لە ڕێگەی وزەی پاک بەرهەمدەهێنرێت.

وێنە گەورەکە: لە کابینەی نۆیەمی حکومەتی هەرێمی کوردستان نزیکەی سێ هەزار و 600 پرۆژە لە بوارەی بەرهەمهێنان و گواستنەوە و دابەشکردنی کارەبا جێبەجێ کراون، ئەمەش بووەتە هۆی زیادکردنی بەرهەمهێنانی کارەبا و کەمکردنەوەی سەرپێچی و بەفیڕۆچوونی کارەبا، لە هەمان کاتدا لە ڕێگەی پرۆژەی ڕووناکییەوە تا کۆتایی ساڵی 2026 کارەبای سەرتاسەری هەرێمی کوردستان دەکرێتە 24 کاتژمێری.

لێدوانی فەرمی: کەمال محەممەد، وەزیری کارەبای هەرێمی کوردستان گوتی: ئاستی بەرهەمهێنانی کارەبا بە وزەی پاک و خاوێن گەیشتووەتە 84٪، بەجۆرێک 83٪ـی لە گازی سرووشتی و 1٪ـی لە کارۆئاوی.

ژمارەکان وادەڵێن: ڕێژەی بەرهەمهێنانی کارەبا لە هەرێمی کوردستان بەگوێرەی جۆری وزە بەمجۆرەیە:

- گازی سرووشتی 83٪
- نەوتی ڕەش 11٪
- گازوایل 5٪
- کارۆئاوی 1٪

بە تەنیشت ئەم بابەتەوە: تا ئێستا لە ڕێگەی پرۆژەی ڕووناکی سێ هەزار و 222 مۆلیدە کوژێنراونەتەوە، ئەمەش دەبێتە هۆی کەمکردنەوەی 600 هەزار تۆن لە دەردانی گازی دووانە ئۆکسیدی کاربۆن.

بۆچی گرنگە: بەرهەمهێنانی کارەبا لە ڕێگەی وزەی پاک و کوژانەوەی مۆلیدەکان کاریگەری ڕاستەوخۆی لەسەر پاکبوونەوەی هەوا دەبێت، ڕێژەی گازە ژەهراوییەکان و تەنۆلکە زیانبەخشەکانی ناو هەوا کەمدەکاتەوە، ئەمەش کاریگەری ڕاستەوخۆی لەسەر پاکبوونەوەی ژینگە و تەندرووستی مرۆڤ دەبێت.

کاریگەری و لێکەوتەکان: بەپێی ئامارەکانی وەزارەتی تەندرووستی هەرێمی کوردستان ئەمساڵ ڕێژەی تووشبوون بە شێرپەنجە کەمیکردووە، یەکێک لە هۆکارە سەرەکییەکانیش پاککبوونەوەی ژینگەی هەرێمی کوردستانە.