لە عێراقەوە جارێکی دیکە هێرش کرایە سەر ئیسرائیل

ئاڤا نیوز

بەرەی مقاوەمەی ئیسلامی لە عێراق جارێکی دیکە لە ڕێگەی فڕۆکەی بێ فڕۆکەوانەوە هێرش دەکاتە سەر پێگەکانی ئیسرائیل و چەند شوێنێک دەکاتە ئامانج.

وێنە گەورەکە: سەرەڕای هۆشداری حکومەتی عێراق و هەوڵدان بۆ دوورخستنەوەی وڵاتەکە لە کاریگەرییەکانی شەڕی نێوان ئیسرائیل و گرووپە چەکدارەکانی سەر بە ئێران، هێرشەکانی بەرەی مقاوەمە لە عێراق بۆ سەر پێگەکانی ئیسرائیل بەردەوامن.

 
ڕاگەیێنراوی فەرمی: بەرەی مقاوەمەی ئیسلامی لە عێراق لە ڕاگەیێنراوێکدا ئاماژە بۆ ئەوە دەکات،  بەیانی ئەمڕۆ 7-10-2024 ئامانجێکی سەربازیی ئیسرائیلیان کردووەتە ئامانج.

 
زانیاریی زیاتر: مقاوەمەی ئیسلامی ڤیدۆی ساتی هەڵدانی چەند فڕۆکەیەکی بێ فڕۆکەوانی بڵاوکردووەتەوە و دەڵێت بەرەو ئامانجێکی سەربازیی ئیسرائیل ئاراستەیان کردووە.

باکگراوند: گرووپە چەکدارەکانی بەرەی مقاوەمە تاوەکو ئێستا چەندجارێک لە عێراقەوە هێرشیان کردووەتە سەر پێگەکانی ئیسرائیل، کاریگەرترینیان هێرشێک بوو سێ ڕۆژ لەمەوبەر، بەهۆیەوە دوو سەربازی ئیسرائیلی کوژراون و 25 ی دیکە بریندار بوون.

ئەوەی پێویستە بیزانیت: بەهۆی هەڵکشانی ئاڵۆزییەکان حکومەتی عێراق ترسی لێنیشتووە لەلایەن ئیسرائیلەوە خاکەکەی بکرێتە ئامانج و زیاتر لە هەفتەیەکیشە سەرجەم هێزەکانی خستوونەتە ئامادەباشیەوە. ئێوارەی دوێنێ محەممەد شیاع سوودانی پەیامێکی بڵاوکردەوە و هۆشداری دا لەوەی عێراق لە دۆخێکی مەترسیداردایە.