حیزبوڵڵا: ئیسرائیل هێزەکانی  UN وەکو قەڵغانی مرۆیی بەکاردەهێنێت

ئاڤا نیوز

 

حیزبوڵڵا، سوپای ئیسرائیل بەوە تۆمەتبار دەکات کە هێزەکانی ئاشتیپارێزی "یو ئێن" لە باشووری لوبنان وەکو قەڵغانی مرۆیی بەکاردەهێنێت. 

 

وێنە گەورەکە: ئیسرائیل لە سەرەتایی هەفتەی ڕابردوو لە هێرشێکی زەمینی سنووردارەوە چووەتە ناو خاکی لوبنان و بە شێوەیەکی ڕاستەوخۆ ڕووبەڕووی هێزەکانی حیزبوڵڵا دەبێتەوە.

 

ڕاگەیێندراوی فەرمی: حیزبوڵڵا لە بەیاننامەیەکدا ڕایگەیاند: "چەکدارەکانمان لە سنووری شاری مەرون ئەل راس، جووڵەی نائاسایی هێزەکانی ئیسرائیلیان لە پشت هێزەکانی ئاشتیپارێز بینیوە، ئەوان هەوڵ دەدەن ئەو هێزانە وەکو قەڵغانی مرۆیی بەکاربهێنن". 

 

لەلایەکی دیکەوە: هێزەکانی ئاشتیپارێزی یوئێن دەڵێن: "بە قووڵی لە شوێنی هێزە سەربازییەکانی ئیسرائیل لە نزیک شوێنی هێزەکانی خۆمان لە باشووری لوبنان نیگەرانین".  

 

ئەوەش بزانە: لەبەر سەخت بوونی دۆخی شەڕی نێوان ئیسرائیل و حیزبوڵڵا، زیاتر لە 30 سەربازی ئیرلەندی سەر بە هێزەکانی ئاشتیپارێزی یوئێن لە بارەگای خۆیان دەرنەچوون.