لاهور شێخ جەنگی: بافڵ و قوباد تاڵەبانی منەتیان بە پێشمەرگە و کەسوکاری شەهیدان نییە

ئاڤا نیوز 

 

لاهور شێخ جەنگی ڕایدەگەیێنێ، گومانی لە تۆمارە دەنگییە بڵاوکراوەکەی بافڵ تاڵەبانی و قوباد تاڵەبانی هەیە، بەڵام دڵنیایە لە قسەکانیان و ئەوان لە کۆبوونەوەکانیاندا بەردەوام دەڵێن منەتیان بە هاووڵاتیان و تێکۆشەران و کەسوکاری شەهیدان نییە. 

 

وێنە گەورەکە: ئەمڕۆ سێشەممە لیژنەی ڕاگەیاندنی پارتی تۆماری دەنگی پەیوەندییەکی تەلەفۆنی نێوان بافڵ تاڵەبانی و قوباد تاڵەبانی بڵاوکردەوە، تێیدا باسی هەڵبژاردنی پەرلەمانی کوردستان دەکەن و جەخت لەوە دەکەنەوە منەتیان بە دەنگی کەسوکاری شەهیدان و ئەنفالکراوان و پێشمەرگە نییە و با دەنگ بە لاهور بدەن. دەشڵێن یەکێتی 30 کورسی لە بەغدا بۆ مسۆگەر کراوە بۆیە بێمنەتن.

 

بۆچوونی بەرامبەر: لاهور شێخ جەنگی، سەرۆکی بەرەی گەل دەڵێت، "گومانم لەو تۆمارە دەنگییە هەیە کە بڵاوکراوەتەوە، بەڵام قسەکانی نێو تۆمارە دەنگییەکە ڕاستە و چەندینجار بافڵ و قوباد تاڵەبانی لە کۆبوونەوەکانیان ئەو قسانەیان کردووە، کە منەتیان بە کەسوکاری شەهیدان و پێشمەرگە و ئەنفالکراوان نییە". 

 

لاهوور شێخ جەنگی ئەوەش دەخاتەڕوو، "دەنگدەراندەران نابێت بەو خۆنمایشەی بافڵ تاڵەبانی هەڵبخەڵەتێنرێن، چونکە ئەمە تەنیا بۆ بانگەشەی هەڵبژاردنە و هیچی تر نییە".