وەزارەتی دارایی لەبارەی ڕاگرتنی مووچەی خانەنشینانی یەکەی 70 ڕوونکردنەوە دەدات

ئاڤا نیوز

وەزارەتی دارایی و ئابووریی هەرێمی کوردستان لەبارەی ڕاگرتنی مووچەی خانەنشینانی یەکەی 70 ڕوونکردنەوە دەدات و ڕایدەگەیێنێ، هۆکارەکەی بۆ جێبەجێکردنی یاسای چاکسازی دەگەڕێتەوە و بەرپرسانی یەکەکە بەرپرسیارن و نایانەوێت کێشەکە چارەسەر بکرێت.

وێنە گەورەکە: 10 ساڵە کێشەی خانەنشینانی یەکەی 70 بە هەڵواسراوی ماوەتەوە، بەگوێرەی یاسای چاکسازی نابێت هیچ خانەنشینێک لە دەرەوەی بەڕێوەبەرایەتیی خانەنشینی وەزارەتی دارایی مووچە وەربگرێت، هاوکات نابێت هیچ دامەزراوەیەکی ئەمنی بەڕێوەبەرایەتیی خانەنشینی هەبێت، بەم هۆیەوە چوار مانگە لەلایەن وەزارەتی دارایی عێراقەوە مووچەکانیان ڕاگیراوە.

لێدوانی فەرمی: هونەر جەمال، گوتەبێژی وەزارەتی دارایی و ئابووریی هەرێمی کوردستان لە کۆنگرەیەکی ڕۆژنامەوانیدا لەبارەی کێشەی خانەنشینانەی یەکەی حەفتا گوتی، " نۆ هەزار و 75 کەس وەک خانەنشینی هێزەکانی 70 مووچە وەردەگرن و مووچەکەیان 3.8 ملیار دینارە، کێشەی دۆسیەیان هەیە و هیچ مەلەفێکیان لە وەزارەتی دارایی نییە، بەڵکو یەکەکە خۆ بەشی خانەنشینی هەیە، بەڵام بەپێی بڕیاری هەردوو دیوانی چاودێریی دارایی کوردستان و عێراق نایاسییە. بەغدا لەدوای مانگی سێ مووچەی بۆ نەناردوون، مووچەی مناگەکانی چوار، پێنج، شەش و حەوت لە داهاتی ناوخۆ دابین کراوە." 

هۆکارە زانراوەکان: بە گوتەی هونەر جەمال، بەرپرسانی یەکەی 70 کەمتەرخەم بوون لە گواستنەوەی دۆسیەی خانەنشینان یەکەکە بۆ سەر بەڕێوەبەرایەتیی خانەنشینی وەزارەتی دارای، تاوەکو ئێستا لە کۆی نۆ هەزار و 75 کەس دۆسیەی 200 کەس گواستراوەتەوە، بەڵام دوای وردبینی دەرکەوتووە کەموکوڕی لە دۆسیەی ئەو 200 خانەنشینەش هەبووە و بەم هۆکارە بۆیان گەڕێنراوەتەوە.


لەلایەکی دیکەوە: گوتەبێژی وەزارەتی دارایی ئاماژەی بۆ ئەوەش لەدوای مانگی سێوە وەزیری دارایی هەرێمی کوردستان لەسەر بەرپرسیارێتی خۆی مووچەی لە داهاتی ناوخۆ بۆ خەرج کردوون، بەڵام بەو مەرجەی لە چەند مانگێک کێشەکە چارەسەر بکەن، کەچی تاوەکو ئێستا دۆسیەکانیان ڕەدەست نەکردووە، بۆیە وەزارەت چیتر ئامادە نییە مووچەیان بۆ خەرج بکات.