گەورەترین پڕۆژەی گەشتیاری لەسەر ئاستی ڕۆژهەڵاتی ناوەڕاست لە سۆران دروست دەکرێت

ئاڤا نیوز 

 
سەرۆکوەزیران مەسرور بارزانی، مژدەی دروستکردنی پرۆژەیەکی گەورەی گەشتیاری لەسەر ئاستی ڕۆژهەڵاتی ناوەڕاست لە سنووری ئیدارەی سەربەخۆی سۆران ڕادەگەیێنێت.

 

وێنە گەورەکە: ئەمڕۆ چوارشەممە  9-10-2024، سەرۆکوەزیران مەسرور بارزانی، هوتێلی ڕادیسن بلووی لەسەر لووتکەی چیای کۆڕەک لە سنووری ئیدارەی سەربەخۆی سۆران کردەوە کە پڕۆژەیەکی گەشتیاری گرنگە لە ناوچەکە.

 

لێدوانی فەرمی: دوای ئەوەی سەرۆکوەزیران سەرجەم بەشەکانی ئەو پڕۆژەکەی بەسەرکردەوە، لە گوتارێکدا ڕایگەیاند: "پڕۆژەیەکی گەورە و گرنگ لەسەر ئاستی ڕۆژهەڵاتی ناوەڕاست لە سنووری ئیدارەی سەربەخۆ سۆران بونیاد دەنرێت، ئێستا ماستەر پلانی پڕۆژەکە ئامادەکراوە، ئەم پڕۆژەیەش دەبێتە یارمەتیدەرێکی زۆر باش بۆ ڕاکێشانی سەرنجی گەشتیارانی عێراق و دەرەوەش". 

 

سەرۆکوەزیران مەسرور بارزانی لەبارەی گرنگی ناوچەکە ڕایگەیاند: ئەم دەڤەرە زۆر جێگەی جوان و سەرنجڕاکێشی هەیە، شاخ و سروشت و ئاوە سازگارەکەی زۆر شوێنی جوانی دروستکردووە، بۆیە بەپێویستی دەزانین پڕۆژەی گەورە لەو ناوچەیە زیاد بکرێت. 

 

لەلایەکی دیکەوە: سەرۆکوەزیران لەبارەی کردنەوەی هۆتێلی ڕادیسن بلوو لەسەر چیای کۆڕەک ڕایگەیاند: ئەمە نیشانەی ئەوەیە خەڵکی کوردستان نەک تەنیا ئازایە لە بەرگریکردن لە خۆی لەناو شاخەکان، بەڵکو دەتوانێت شاخەکانیش بەکاربهێنن بۆ دروستکردنی پڕۆژەی خزمەتگوزاری و خزمەتی هاووڵاتیان، ئەمەش هاوکار دەبێت لە ناساندنی جوانی کوردستان بە خەڵکی.

 

مەسرور بارزانی لە درێژەی قسەکانیدا گوتی: ئێمە هەڵمەتێکی گەورەمان دەستپێکردووە بۆ زیاتر ناساندنی شوێنە گەشتیارییەکان بە گەشتیارانی بیانی، تاوەکو سەردانی هەرێمی کوردستان بکەن، لە ڕیگەی دروستکردنی ڕێگاوبان و هاتووچۆ و ئاسنکاریکردن بۆ هاتنی خەڵک لە فڕۆکەخانەکانەوە، بۆیە هیواخوازی لە عێراق و دەرەوەش خەڵکی بێن بۆ سەردانی ئەو شوێنانە.

 

باکگراوەند: ئیدارەی سەربەخۆی سۆران دەوڵەمەندە بە ژمارەیەکی زۆر ناوچەی گەشتیاری کە ژمارەیان 540 ناوچەی گەشتیارییە و 35%ـی ناوچە گەشتیارییەكانی هەرێمی كوردستان پێكدەهێنن.