وەزیری بەرگریی ئیسرائیل هۆشداری دەداتە عێراق

ئاڤا نیوز

وەزیری بەرگریی ئیسرائیل ڕایدەگەیێنێ، دەستیان بە هەموو ناوچەیەکی ڕۆژهەڵاتی ناوەڕاست دەگات و، "بەتووندی" ڕووبەڕووی ئەو هەڕەشانە دەبنەوە کە لە عێراق و وڵاتانی دیکەوە دەکرێتە سەریان.

وێنە گەورەکە: سەرەڕای بەردەوامی هەوڵەکانی دەسەڵاتدارانی عێراق بۆ دوورخستنەوەی وڵاتەکە لە گرژییەکان، بەڵام گرووپە چەکدارەکان لە خاکی عێراقەوە بەردەوامن لە هێرشکردنە سەر ئیسرائیل، لەو چوارچێوەیەشدا گریمانەی ئەوە دەکرێت ئیسرائیل چەند پێگەیەکی گرووپە چەکدارەکان لەناو عێراقدا بۆردوومان بکات.

لێدوانی فەرمی: یوواڤ گالانت، وەزیری بەرگریی ئیسرائیل لەمیانی بەسەرکردنەوەی بنکەیەکی هەواڵگریی سەربازیی وڵاتەکەی  ڕایگەیاند: "ئەو شەڕەی ئێستا دەیکەین هەموو دەزگاکانی وڵاتەکەمان بەشدارن تێیدا، توانای ئەوەشمان هەیە بگەینە هەموو ناوچەیەکی ڕۆژهەڵاتی ناوەڕاست، ئێران، لوبنان، سووریا، یەمەن، عێراق و هەر ناوچەیەکی دیکە کە ببێتە سەرچاوەی هەڕەشە بەتووندی ڕووبەڕوویان دەبینەوە".

لەلایەکی دیکەوە: پەیوەست بە هێرشە مووشەکییەکانی 1ـی ئەم مانگەی ئێران بۆ سەر وڵاتەکەی، وەزیری بەرگریی ئیسرائیل گوتی: "هێرشەکەی ئێران دووژمنکارانە بوو، بەڵام ورد نەبوو، فڕۆکەخانەکانمان زیانیان پێنەگەیشت و هەموو فڕۆکەکانمان بەرەو ئامانجەکانیان دەڕۆن، لەلایەکی دیکەشەوە هێرشەکانمان کوشندە و ورد و سەرسوڕهێنەر دەبن، بەجۆرێک دەبن کە نەیارەکانمان تێناگەن چی ڕوویداوە و چۆن بووە".