تەرمی عەباس نیلفرووشان دۆزرایەوە

ئاڤا نیوز

 

سوپای پاسدارانی ئێران ڕایگەیاند، تەرمی عەباس نیلفرووشان، فەرماندەیەکی سوپای قودس لە لوبنان و سووریا، دۆزراوەتەوە. 

 

وێنە گەورەکە: ڕۆژی 27ـی ئەیلوول ئیسرائیل، لە هێرشێکی ئاسمانیدا نزیکەی 80 تۆن بۆمبی بە سەر پێگەیەکی فەرماندەیی حیزبوڵڵا لە بەیرووت باراند و بە هۆیەوە حەسەن نەسڕوڵڵا، ئەمینداری گشتیی حیزبوڵڵای لوبنان و نیلفرووشان و ژمارەیەک فەرماندەی دیکە کە لە کۆبوونەوەیەکدا بوون، کوژران.

لێدوانی فەرمی: بەگوێرەی ڕاگەیێنراوەکەی سوپای پاسداران، تەرمی نیلفرووشان لە شوێنی بەئامانجگرتنی حەسەن نەسروڵا لە بەیرووت دۆزراوەتەوە و دوای گەڕاندنەوەی بۆ ئێران، کاتی بەخاکسپاردنی ڕادەگەێینرێت.

 

ئەمەش بزانە: نیلفرووشان، لە ساڵی 1966 لە ئیسفەهان لەدایک بووە، لە هەشتاکانی سەدەی ڕابردوو دا دەستی بە چالاکییە سەربازییەکانی کردووە، پەیوەندی بە بەسیج و دواتریش پەیوەندی بە سوپای پاسداران کردووە، پۆستی جۆراوجۆری هەبووە لەوانە جێگری فەرماندەی هێزی زەمینی سوپای پاسداران بۆ ئۆپەراسیۆنەکان.