سوودانی: کاری لەپێشینەمان وەستاندنی گرژییەکانی ناوچەکەیە

ئاڤا نیوز

 

سەرۆکوەزیرانی عێراق دەڵێت، ئەرکی لەپێشینەی حکومەتەکەی لە ئاستی ناوچەکەدا، بریتییە لە ڕاگرتنی هێرشەکانی ئیسرائیل بۆسەر فەڵەستین و لوبنان، لە ڕەوانەکردنی هاوکاری مرۆییش بۆ ئەو دوو وڵاتە بەردەوام دەبین.

 

وێنە گەورەکە: لە چوارچێوەی سەردانەکانیدا بۆ وڵاتانی ناوچەکە و بۆ گفتوگۆکردن لەسەر دۆخی گرژییەکانی ڕۆژهەڵاتی ناوەڕاست، ئەمڕۆ عەباس عێراقچی، وەزیری دەرەوەی ئێران گەیشتە بەغدا.

 

ڕاگەیێنراوی فەرمی: محەممەد شیاع سوودانی، سەرۆکوەزیرانی عێراق لەکۆبوونەوەیدا لەگەڵ وەزیری دەرەوەی ئێران ڕایگەیاند، ئێستا کاری لەپێشینەی حکومەتی عێراق تایبەت بە دۆخی ناوچەکە، بریتییە لە ڕاگرتنی هێرشە دوژمنکارییەکانی ئیسرائیل بۆسەر غەززە و لوبنان و ڕێگریکردن لە فراوانبوونی شەڕ لە ناوچەکەدا، بۆ ئەو مەبەستەش بەهاوبەشی لەگەڵ وڵاتانی ئەوروپا هەموو هەوڵێک دەخەینەگەڕ.

 

ئەوەشی خستوەتەڕوو، هەوڵی عێراق بۆ پاراستنی ئارامی گەلان و ئاسایشی وڵاتانی ناوچەکە لە بەرژەوەندی ئاسایشی نەتەوەیی عێراقیشە، لەم قۆناغەشدا بەغدا لە پاڵ هەوڵە دیپلۆماسییەکان، لە ناردنی هاوکاریی مرۆییش بۆ غەززە و لوبنان بەردەوام دەبێت.

 

لەلایەکی دیکەوە: وەزیری دەرەوەی ئێران ئاماژەی بەوەدا، سەردانەکەی بۆ بەغدا بە ئامانجی ڕاوێژکردنە لەسەر دۆخی ناوچەکە، ئێران و عێراقیش هاوڕان کە نابێت ڕێگە بە فراوانبوونی شەڕ بدرێت.