برایەكی هاوكار جاف: لوئەی ڕەزا دانی بە شەهیدكردنی براكەمدا ناوە

ئاڤا نیوز

 

محەممەد جاف، برای هاوكار جاف، باسی بكوژی براكەی دەكات و دەڵێت: "بە فەرمانی وەهاب هەڵەبجەیی و بافڵ تاڵەبانی براكەم شەهید كراوە".

 

چیرۆكی سەرەكی: دوێنێ گرتەیەكی ڤیدیۆیی بڵاوبووەوە و تێیدا دەردەكەوێت، لوئەی ڕەزا كە ئەفسەرێكی دژەتیرۆری یەكێتییە دان بە کوشتنی هاوكار جافدا دەنێت و دەڵێت: "ئەگەر ئەو شەهیدەی ئێوە دەیڵێن پەیوەندیی بە وەهاب هەڵەبجەیی و بافڵ تاڵەبانییەوە هەبێت ئەوا هیچ پەیوەندیی بە ئەوانەوە نییە، ئەوە منم، من هەر كەسێكم كوشتبێت دە جار زیندوو بێتەوە، هەر دەیكوژمەوە".

 

لێدوانی فەرمی: محەممەد جاف، برای هاوكار جاف لە كۆنفڕانسێكی ڕۆژنامەوانیدا ڕایگەیاند: "دوێنێ ڤیدیۆیەك بڵاوبووەوە كە كەسێك بە ناوی لوئەی ڕەزا باس لە شەهیدكردنی هاوكار جاف دەكات و كردەوەكەی خستووەتە ئەستۆی خۆی، ئەمە لەكاتێكدایە دوو ساڵە ئەو تیرۆریستە دەڵێ ئێمە نین، داوامان لە داواكاری گشتی و دادگاكانی كوردستان و عێراق ئەوەیە كە بەزووترین كات بدرێتە دادگا".

 

لەلایەكی دیكەوە: محەممەد جاف ئاماژەی بە ئەوەش دا، ئەمڕۆ بە گوشاری بەرپرسانی دەباشان لوئەی ڕەزا قسەی خۆی گۆڕیوە و پاشەگەز بووەتەوە، گوتیشی: "هەموو كاردانەوەیەكمان پێدەكرێت و ڕێگەمان زۆرە، بەڵام دەمانەوێت لە دادگا كارەكە بكرێت، لە دادگاكانی ئەمریكاش داوامان تۆمار كردووە و سەرجەم بەڵگەكان دەخەینەڕوو و دەبێت بگەین بە مافی خۆمان".

 

براكەی هاوكار جاف جەختی كردەوە: "كردەوە تیرۆریستییەكە بە فەرمانی وەهاب هەڵەبجەیی و بافڵ تاڵەبانی کراوە".