نەتەوە یەکگرتووەکان: ڕووبەڕووبوونەوەی گۆڕانی کەشوهەوا لەئاستی پێویستدا نییە

ئاڤا نیوز

 

نەتەوە یەکگرتووەکان نیگەرانە لە هەوڵە نێودەوڵەتییەکانی تایبەت بە ڕووبەڕووبوونەوەی گۆڕانی کەشوهەوا و دەڵێت، بۆ دابینکردنی ژینگەیەکی پاک و تەندروست، جیهان پێویستی بە ترلیۆنان دۆلار وەبەرهێنان لەم بوارەدا هەیە.

 

وێنە گەورەکە: لەگەڵ زیادبوونی نیگەرانییەکانی تایبەت بە توانەوەی بەفری جەمسەر و چیاکان بە شێوەیەکی خێرا، دۆسیەی گۆڕانی کەشوهەوا و گەرمبوونی زەوی وەک مەترسییەکی ژینگەیەکی ڕووبەڕووی جیهان بووەتەوە و وڵاتانی پێشکەوتوو کار بۆ بەرەنگاربوونەوەی دەکەن.

 

لێدوانی فەرمی: سیمۆن ستیل، ئەمینداری جێبەجێکاری دامەزراوەی نەتەوە یەکگرتووەکان تایبەت بە گۆڕانی کەشوهەوا لە میانەی بەشداریکردنی لە پرۆگرامی ئابووری جیهانی و گەشەپێدانی سەر بە پەیمانگای بروکینگز، ئاماژەی بەوەکرد، "ساڵی ڕابردوو بەبەهای ترلیۆنێک دۆلار وەبەرهێنان لەبواری ژینگە و کەشوهەوادا کراوە  و ئەوە بەهیچ شێوەیەک لەئاستی پێویستیدا نییە، دەبێت هەوڵی کۆکردنەوەی ترلیۆنان (دۆلار)ی دیکە بدەین".

 

ئاماژەی بەوەشکرد، زیانەکانی کەشوهەوا بە ملیاران دۆلار مەزەندە دەکرێت و هۆکارێکی سەرەکی وێرانبوونی هەموو ئابورییەکانە، بۆیە ئێستا کاتی ئەوەیە جیهان بەرەو وەبەرهێنانی گەورە لە وزەی پاک و ئابوریی سەوز هەنگاوبنێت، هاوکات دەبێت پارەی تەرخانکراو بۆ پاراستنی ژینگە لەوەی ئێستا زۆر زیاتر بکرێت.

 

کاریگەریی و لێکەوتەکان: بەشێک لە وڵاتانی جیهان بەهۆی کەڵەکەبوونی قەرزەکانیانەوە ناتوانن لەبواری گۆڕانی کەشوهەوادا چالاک بن، بۆیە دامەزراوەی نەتەوە یەکگرتووەکان تایبەت بە گۆڕانی کەشوهەوا پێشنیار دەکات بانکی نێودەوڵەتی هاوکاربێت تا ئەو وڵاتانە و وڵاتانی تازە گەشەسەندوو هاوکاریی دارایی پێویستیان بۆ کاری کەشوهەوا و وەبەرهێنان تێیدا بەدەستبگات.

 

ئەوەی پێویستە بیزانیت: نەتەوە یەکگرتووەکان باوەڕی وایە لەپاڵ بانکی نێودەوڵەتی، وڵاتانی گرووپی G20 و بانکە گەورەکانی تری جیهان دەتوانن کاریگەرییان لەسەر باشترکردنی ڕەوشی کەشوهەوا هەبێت، بۆیە داوایان لێدەکات لە پێشکەشکردنی هاوکاری بۆ پڕۆژەکانی ئابووری سەوز و وەبەرهێنان لەم بوارەدا ڕێکاری ئاسانتر جێبەجێ بکەن، هاوکات بەپێویستی دەزانێت  سندووقی قەرەبووکردنەوەی زیانەکانیش لە ئەنجامی گۆڕانی کەشوهەوا بەتەواوی ئەرکی خۆی جێبەجێ بکات بۆ هاوکاری ئەو وڵاتانەی زۆرترین زیانیان لە دەرئەنجامی گۆڕانی کەشوهەوا بەرکەوتووە.