پارتی لەبارەی ئەنجامی دەنگدانی تایبەت ڕوونکردنەوە دەدات

ئاڤا نیوز

 

پارتی دیموکراتی کوردستان لەبارەی ئەنجامی دەنگدانی تایبەت کە یەکێتی نیشتیمانی کوردستان بڵاوی کردووەتەوە، ڕوونکردنەوە دەدات و ئەنجامەکە بە فەرمی ڕەت دەکاتەوە.

 

وێنە گەورەکە: ئەمڕۆ یەکشەممە، گوتەبێژی لیستی یەکێتی  نیشتیمانی کوردستان ئەنجامی دەنگدانی تایبەتی بڵاوکردەوە، بەپێی داتاکەی یەکێتی، پارتی:  74 هەزار و 513 دەنگ، یەکێتی: 70 هەزار و 10 دەنگ، نەوەی نوێ:  5 هەزار و 329 دەنگیان هێناوە.

ڕاگەیێنراوی فەرمی: لیژنەی باڵای هەڵبژاردنی پارتی ڕایگەیاند: تەواوی وردەکاری و ئەنجامەکانی دەنگدانی تایبەت کە بە سیستمێکی دیجیتاڵی پێشکەوتوو کۆکراوەتەوە و لامان بەردەستن، بەڵام وەکو پابەندبوون بە یاسا و ڕێنماییەکان، پاراستن و ڕێزگرتن لە پڕۆسەی هەڵبژاردن، چاوەڕێی بڵاوکردنەوەی ئەنجامە بەراییەکان دەکەین لەلایەن کۆمسیۆنی باڵای هەڵبژاردنەوە.

 

لیژنەی باڵای هەڵبژاردنی پارتی گوتی، هەموو ئەو ژمارانە بەهەڵە و بێبنەما دادەنێین و ڕەتیان دەکەینەوە کە "لایەنێکی سیاسی ناڕاستگۆیانە بۆ چەواشەکردن بڵاویکردوونەتەوە". ئاماژەی بەوەش داوە "پارتی سەرکەوتنی گەورە بەدەست دێنێت و ئەنجامەکانی کۆتایی پڕۆسەکە بەهێزترین وەڵام دەبێت بۆ چەواشەکاران".

 

لەلایەکی دیکەوە: عیماد جەمیل، سەرۆکی تیمی میدیایی کۆمیسیۆنی هەڵبژاردنەکانی عێراق بە ئاڤا نیوزی گوت: "ئەو ئەنجامەی یەکێتی بڵاویکردووەتەوە پەیوەندی بە ئێمەوە نییە،  ئێمە ڕۆژی دووشەممە 24 کاتژمێر دوای دەنگدانی گشتی، ئەنجامی بەرایی و هەموو زانیارییەکی پەیوەست بە هەردوو دەنگدانی تایبەت و گشتیی بڵاودەکەینەوە".

 

ژمارەکان وادەڵێن: ئاڤا نیوز ئەنجامی دەنگدانی تایبەتی بۆ هەڵبژاردنی خولی شەشەمی پەرلەمانی کوردستان دەستکەوتووە، بە کۆی گشتی پارتی 86 هەزار و 210 دەنگ، یەکێتی 49 هەزار و 684 دەنگ و نەوەی نوێ 10 هەزار و 913 دەنگیان هێناوە.