پارتی: بۆ پێکهێنانی کابینەی 10 ڤیتۆمان لەسەر هیچ لایەنێک نییە

ئاڤا نیوز


پارتی دیموکراتی کوردستان لەبارەی پێکهێنانی حکومەتی داهاتوو ڕایدەگەیێنێ، ڤیتۆیان لەسەر هیچ کەس و لایەنێک نییە، تەنها ئەوەیان بەلاوە گرنگە حکومەتێکی سەرتاسەرى پێکبهێنرێت.

چیرۆکی سەرەکی: بەسەرپەرشتیی سەرۆك بارزانی، كۆمیتەی ناوەندیی پارتی بۆ یەکەمجار لەدوای هەڵبژاردنی خولی شەشەمی پەرلەمانی کوردستان کۆبووەوە.  هەڵوێستی فەرمی لەبارەی هەڵبژاردن دەربڕی و ڕایگەیاند، سەرەڕای ئەوەی هەندێک تێبینییان هەیە، بەڵام پرۆسەکە سەرکەوتوو بووە.

 

ڕاگەیێنراوی فەرمی: یەکێک لە تەوەرەکانی کۆبوونەوە پرسی پێکهێنانی حکومەتی داهاتوو بووە و پارتی جەخت دەکاتەوە: "لەپێناو پاراستنى بەرژەوەندییە باڵا نەتەوەیى و نیشتمانییەکان و پاراستنى قەوارەى دەستووریى هەرێم، ڤیتۆى لەسەر هیچ کەس و لایەنێک نییە، ئەوەى لاى پارتى پێشینە و گرنگە لەم قۆناغەدا پاراستنى قەوارەى هەرێم و هەبوونى یەک حکومەتى سەرتاسەرى و پاراستنى ماف و ئازادییەکانى خەڵکى کوردستان و خزمەتکردنى هاووڵاتیانە، بۆ ئەم مەبەستە کۆبوونەوە دەسەڵاتى دا بە مەکتەبى سیاسى بەگوێرەى پێویست بەرنامەڕێژى بکات و هەنگاوى گونجاو بنێت".

باکگراوند: پارتی لە هەڵبژاردنی ئەمجارە وەکو هەمیشە یەکەم بوو، زیاتر لە 800 هەزار دەنگ (39) کورسی بەدەستهێنا. لەم هەڵبژاردنە ژمارەی دەنگەکانی بەراورد بە هەڵبژاردنی خولی پێنجەمی پەرلەمان کە 2018 کرا، 121 هەزار دەنگ زیادی کرد.