لە داقووق لەسەر زەویوزار دوو بنەماڵە دەبێتە شەڕیان و هەشت کەس دەستگیر دەکرێن

ئاڤا نیوز

 

دوای ئەوەی دەنگۆی دەستگیرکردنی هەشت جووتیار لەلایەن سوپای عێراقەوە بڵاوکرایەوە، پارێزگاری کەرکووک دەڵێت: "ئەوانەی دەستگیرکراون شەڕیان لەسەر زەویوزار بووە و هیچ پەیوەندی بە بابەتی سیاسییەوە نییە".

 

وێنە گەورەکە: کێشەی زەویوزار لەنێوان کورد و عەرەب لە سنووری کەرکووک بۆ سەردەمی ڕژێمی بەعس دەگەڕێتەوە، کاتێک ساڵی 1975 جووتیارانی کورد دەرکران و زەوی و موڵک و ماڵیان بە عەرەبە هاوردەکان درا، دوای نزیکەی 50 ساڵ ئێستا بڕیارە لە پەرلەمانی عێراق ئەو بڕیارە هەڵبووەشێنرێتەوە.

 

چیرۆکی سەرەکی: ئێوارەی ئەمڕۆ شەممە دوو بنەماڵەی کورد و عەرەب لە قەزای داقووقی سەر بە پارێزگای کەرکووک لەسەر زەویوزار دەبێتە شەڕیان، بەهۆیەوە هەشت کەس لەلایەن پۆلیسەوە دەستگیر دەکرێن و دواتر بە بڕیاری پارێزگاری کەرکووک ئازاد دەکرێن.

 

لێدوانی فەرمی: ڕێبوار تەها، پارێزگاری کەرکووک بە ئاڤا نیوزی ڕاگەیاند: "شەڕەکە لەسەر زەویوزار بووە و هەشت کەس لە هەردوولا دەستگیرکرابوون، ئەوەی لەوبارەیەوە باس دەکرێت دوورە لە ڕاستییەوە و بابەتەکە هیچ پەیوەندی بە سیاسییەوە نییە".

 

زانیاریی زیاتر: دوای ئەوەی پارێزگاری کەرکووک لە بابەتەکە ئاگادار دەکرێتەوە، لە ڕێگەی نووسینگەکەیەوە لەگەڵ بنکەی پۆلیسی داقووق قسە دەکرێت و سەرجەمیان ئازاد دەکرێن.