پارتی دەیەوێت هەرێمی کوردستان ببێتە خاوەنی دەستوور

ئاڤا نیوز

 

پارتی دیموکراتی کوردستان، لە خولی شەشەمی پەرلەمانی کوردستان یەكێک لە پلانەکانی ئەوەیە دەستوورێکی هەمیشەی بۆ هەرێمی کوردستان دابنرێت و کاری لەسەر بکات.

 

وێنە گەورەکە: لە ماوەی ڕابردوودا نەبوونی دەستووری لە هەرێمی کوردستان گرفتێکی گەورە بووە، لەم خولەی پەرلەمانیشدا پارتی کار لەسەر ئەوە دەکات کوردستان بکاتە خاوەنی دەستوورێکی هەمیشەیی، لەماوەی خولی پێنجەم پارتی هەوڵێکی زۆریدا بۆ ئەو پرسە چارەنووسازە بەڵام بەشێک لە لایەنەکان لەگەڵیدا نەبوون و بگرە دژایەتیش دەکرا.

 

زانیاریی زیاتر: بەپێی ماددەی 120ی دەستووری هەمیشەی عێراق، مافی ئەوەی بەو هەرێمانە داوە کە لە چواچێوەی دەوڵەتی عێراق دروست دەبن خاوەنی دەستووری خۆیان بن و تایبەتمەندی و میکانیزمەکانی خۆیان دیاریبکەن، هەر بۆیە پارتی دەیەوێت لە خولی شەشەم هەرێمی کوردستان بکاتە خاوەنی دەستووری تایبەت.