لقی دهۆکی کۆمیسیۆن سکاڵا لەسەر کاندیدێکی سەربەخۆ تۆمار دەکات

ئاڤا نیوز

کۆمیسیۆنی باڵای سەربەخۆی هەڵبژاردنەکان لقی دهۆک بەتۆمەتی ناوزڕاندن سکاڵا لەسەر کاندیدێکی سەربەخۆ تۆمار دەکات.

 

وێنە گەورەکە: دوای پرۆسەی هەڵبژاردن بەشێک لە لایەنە سیاسییەکان و کاندیدە سەربەخۆکان نەیانتوانی دەنگی پێویست بەدەستبهێنن، بۆیە باس لەوە دەکەن کە گوایە کۆمیسیۆن لەبەرژەوەندی هەندێک دەستکاری دەنگەکانی کردووە.

 

لێدوانی فەرمی: خالید عەباس، سەرۆکی لقی دهۆکی کۆمیسیۆنی باڵای سەربەخۆی هەڵبژاردنەکان، بە ئاڤا نیوزی ڕاگەیاند: "سکاڵام لەسەر کاندیدێکی سەربەخۆ تۆمار کردووە، کە لە ڕێگەی نامەی دەنگییەوە ناوی زڕاندووم و ئەو کەسە دەڵێت، 'کۆمیسییۆن ساختەکاری لە بەرژەوەندی هەندێک لایەنی سیاسیی کردووە'.

 

خالیدی عەباس گوتیشی: کۆمیسیۆن مافی هەیە سکاڵا لەسەر هەر کاندید و لایەنێکی سیاسیی تۆمار بکات، کە ناویان بزڕێنێت، پێشتریش کەناڵی ئێن ئارتی هانی خەڵکی دەدا تاوەکو دەنگەکانیان بسوتێنن، سکاڵامان لەسەر تۆمارکردن و بە بڕی پێنج ملیۆن دینار سزادراوە.

 

زانیاریی زیاتر: تاوەکو ئێستا 29 سکاڵا لەسەر سندووقی دەنگدان لە لقی کۆمیسییۆنی دهۆک تۆمار کراوە، لێکۆڵینەوە بۆ 21 سکاڵایان کراوە.

 

ئەوەی پێویستە بیزانیت: هەر لایەنێکی سیاسیی  دەتوانێت لە دەستەی دادوەری تایبەتمەند بە هەڵبژاردن سکاڵا لە دژی دەرئەنجامەکانی هەڵبژاردن تۆمار بکات، بەڵام پێویستە بەڵگەی تەواوی لەسەر ساختەکارییەکە هەبێت.