لێدوانێکی نوێ لە سەرۆکوەزیران بارزانییەوە لەبارەی هەژماری من

ئاڤا نیوز

 

سەرۆكوەزیران مەسرور بارزانی لەمیانی بەشداریکردنی لە پانێلێکدا لە دیداری مێری لە هەولێر، باسی پرۆژەی هەژماری منی کرد و ڕایگەیاند: "كارمان لەسەر ئەوە كردووە هەموو كەسێك خاوەنی هەژماری بانكی خۆی بێت، بەڵام ئەمە لە بەرژەوەندی هەموو لایەك نەبووە.

 

وێنە گەورەکە: لەماوەی ڕابردوودا لە سلێمانی کارەکانی پڕۆژەی هەژماری من گرفت و ئاستەنگی بۆ دروستکراوە، لە بانگەشەی هەڵبژاردنیشدا بافڵ تاڵەبانی، سەرۆکی یەکێتی نیشتمانی، داوای لە فەرمانبەران دەکرد فۆڕمی هەژماری من پڕنەکەنەوە و بڕۆن تەوتین بکەن، هاوکات ماوەی چەند ڕۆژێکیشە لە ڕێگەی میدیاکانی یەکێتییەوە هەڵمەتێکی دژایەتیی بۆ ئەو پڕۆسەیە بەڕێوەچووە و نمونەی فۆڕمێکیان بڵاوکردووەتەوە کە هیچ سەلماندنێکی فەرمی نیە. 

لێدوانی فەرمی: لەمیانەی قسەکانیدا سەرۆکوەزیران باسی لە بەدیجتاڵیکردنی مووچەی مووچەخۆران کرد و ڕایگەیاند: جیهان بەرەو کرێدی کارت و بە دیجیتاڵیکردنی بانکی دەڕوات، دابین کردنی سیستەمێکی باشی بانکیش وادەکات وەبەرهێنەری زیاتر ڕوو لە هەرێمی کوردستان بکەن. 

لەلایەکی دیکەوە: سەرۆکوەزیران مەسرور بارزانی، باسی لە دروستکردنی ئاستەنگییەکانی بەردەم ئەو هەنگاوەی کابینەی نۆیەم کرد و گوتی: لە ڕابردوودا زۆر لایەنی سیاسی مووچە و کارتی وەک مەرامی سیاسی لە دژی هاووڵاتییان بەکارهێناوە، بەڵام ئێمە دەمانەوێت هەموو هاووڵاتییەکی هەرێمی کوردستان هەژماری بانکی خۆی هەبێت و کەس نەتوانێت ئیرادەی کەسییان بەسەردا بسەپێنێت. 

 

سەرۆكوەزیران مەسرور بارزانی، باسی پرۆژەی هەژماری منی کرد و ڕایگەیاند: " زۆر لایەن دەیانەوێت مووچە و پارە بەكاربهێنن بۆ فشاری سیاسی، بۆیە دژایەتی هەژماری من دەكەن، چونكە ئەمە خزمەت بە هەموو كەسێك دەكات و خەڵك دژی ئەمەیە، لەبەر ئەوەی ئەوان دەیانەوێت پارە و مووچە بكەنە فشار لەسەر خەڵكی و دەبێت بە یاسا مافی خەڵكی تێدا پارێزراو بێت".