کۆمیسیۆن: ماوەی تانەدان لە ئەنجامی هەڵبژاردن سێ ڕۆژە

ئاڤا نیوز

 

کۆمیسیۆن ڕایگەیاند، تەنیا سێ ڕۆژ مۆڵەت هەیە بۆ تانەدان لە ئەنجامی هەڵبژاردنی پەرلەمانی کوردستان کە بڕیارە سبەی چوارشەممە ڕابگەیێنرێت. 

 

وێنە گەورەکە: ڕۆژی 20-10-2024 هەڵبژاردنی خولی شەشەمی پەرلەمانی هەرێمی کوردستان بەڕێوەچوو و دوای 24 کاتژمێر ئەنجامی بەرایی بڵاو کردەوە و بڕیارە ڕۆژی چوارشەممە 30ی مانگ ئەنجامی فەرمی ڕابگەیێنێت.

 

لێدوانی فەرمی: جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکان ڕایگەیاند: بە گوێرەی یاسای ژمارە 31ی کۆمیسیۆنی باڵای هەڵبژاردنەکانی ساڵی 2019، هەر بەربژێر یان لیستێک دەتوانێت یەک ڕۆژ دوای ڕاگەیاندنی ئەنجامەکان بۆ ماوەی سێ ڕۆژ هەر لە ڕۆژی 31-10 تاوەکو 03-11 تانە لە ئەنجامەکان بدات.

 

غەلای ئەوەشی خستەڕوو کە کاندید و لایەنەکان دەتوانن لە ڕێگەی نووسینگەی کۆمیسیۆن لە پارێزگاکان یان نووسینگەی سەرەکیی دەستەکە یان ڕاستەوخۆ لە دەستەی دادوەری کۆمیسیۆن تانە لە ئەنجامەکان بدەن.

 

ئەوەی پێویستە بیزانیت: ئەنجوومەنی کۆمیسارانی کۆمیسیۆن دوای یەک ڕۆژ لە گەیشتنی داواکاری و پرسیارەکانی دەستەی دادوەری دەربارەی تانەکان لە ماوەی حەوت ڕۆژی دەوامی فەرمی وەڵامی دەستەکە دەداتەوە، هەروەها دەستەی دادوەری لە ماوەی 10 ڕۆژی دەوامی فەرمی بڕیار لەسەر تانەکان دەدات.