سەرۆکی جڤاتی گشتیی گۆڕان: دەبێت هەردوو باڵەکە بە کۆنفرانس پابەندبن

ئاڤا نیوز

 

لەسەر داوای کۆمیسیۆن، بزووتنەوەی گۆڕان کۆنفرانس دەبەستێت، سەرۆکی جڤاتی گشتیی بزووتنەوەکەش دەڵێت "کۆمیسیۆن هەندێک گلەیی لە شێوازی کۆنفرانسی پێشوومان هەبوو، بۆیە ئەو داواکارییانەی هەیبوو بە کۆنفرانسێکی دیکە ڕاست دەبێتەوە".

 

لێدوانی فەرمی: لیوا جەلال مستەفا، سەرۆکی جڤاتی گشتیی گۆڕان، بە ئاڤا نیوزی گوت: ڕاستە بەستنی کۆنفرانس باڵی کوردسات ڕایگەیاندووە، بەڵام پەیوەست نییە بەوانەوە، پێویستە و دەبێت هەردوو باڵی کوردسات و گردەکە پێیەوە پابەندبن.

 

زانیاریی زیاتر: کۆمیسیۆن داوای بەستنی کۆنفرانسی لە بزووتنەوەی گۆڕان کردووە، چونکە کۆمیسیۆن هەندێک گلەیی لە شێوازی کۆنفرانسی پێشوو هەبوو، بەگوتەی لیوا جەلال مستەفا "ئەو داواکارییانەی کۆمیسیۆن هەیەتی بە کۆنفرانسێکی دیکە ڕاست دەبێتەوە".

 

سەرۆکی جڤاتی گشتیی بزووتنەوەی گۆڕان دەڵێت: ئێستا گۆڕان ڕێکخەری گشتیی نییە، عومەری سەید عەلی بۆ ماوەی شەش مانگ وەکالەتی بۆ "دانا ئەحمەد مەجید"  کردووە، بۆ ئەوەی کارەکان تا کۆنفرانس ڕێکبخاتەوە، بۆیە دانا ئەحمەد مەجید دەتوانێت خۆی لە کۆنفرانس بۆ ڕێکخەر هەڵبژێرێتەوە.

 

زانیاریی زیاتر:  لیوا جەلال مستەفا گوتیشی: "لە کۆتاییدا هەردوو باڵی کوردسات و گردەکە وای لێ دێت کار بۆ بەستنی کۆنفرانس بکەن، ئەگەر بەرەو ئاقاری دیکە نەڕوات، چونکە هەندێک گرفت هەیە بەرەو خاوبوونەوە دەڕوات".