ئاڤا میدیا ڕووماڵێکی جیاوازی پێشانگای خانووبەرەی هەولێری کرد

 

ئاڤا نیوز

 

دوای چوار ڕۆژ پێشانگای نێودەوڵەتی وەبەرهێنانی خانووبەرە لە هەولێر کۆتایی هات، ئەمساڵ ئاڤا سپۆنسەری سەرەکی میدیایی پێشەنگاکە بوو.

 

وێنە گەورەکە: ئەمساڵ ستەیجی ئاڤا ڕۆژانە لەڕێگەی دوو پێشکەشکارەوە بۆ ماوەی 14 کاتژمێر و میوانداریکردنی 35 کەسانی شارەزا و کونسوڵی وڵاتان ڕووماڵی پێشانگاکەیان کرد، دەیان بابەت لەبارەی کەرتی خانووبەرە و بیناسازی و بانک باسیان لێوەکرا، ئەمە جگە لەوەی سێ پەیامنێر بەردەوام بۆچوونی هاونیشتمانییان و کۆمپانیاکانی دەگواستەوە. 

 

ژمارەکان وادەڵێن: داتاکانی چوار ڕۆژی پێشانگای وەبەرهێنانی خانووبەرە دەریدەخەن، زیاتر لە 40 هەزار کەس سەردانی پێشانگاکەی کردووە، ئەمە جگە لەوەی 260 گرێبەستی کڕێنی خانوو و شوقە ئەنجامدراون و 900 بزنسمان سەردانی پێشانگاکەیان کردبوو.

 

زانیاریی زیاتر: لە پێشانگای ئەمساڵی وەبەرهێنانی خانووبەرە، 260 کۆمپانیا لە 15 وڵاتەوە بەشداریان کردبوو، 140 کۆمپانیای ناوخۆیی و 120 کۆمپانیای بیانی بوون. ئەم هەمەڕەنگییە لە بەشداریی وایکرد دەیان ڕێککەوتن لەنێوان کۆمپانیا ناوخۆیی و بیانییەکان ئەنجام بدرێت بۆ ئاڵوگۆڕکردنی ئەزموون.