دژایەتیی یەکێتی بۆ پرۆژەی هەژماری من بەردەوامە

ئاڤا نیوز

 

ماوەیەکە باس و خواسی بەشێک لە فەرمانبەران لە پارێزگای سلێمانی بووەتە بابەتی تەوتین کردنی مووچە و یەکێتی نیشتمانی کوردستان و ڕاگەیاندنەکانی خەریکی ڕەواجدانن بەم کارە.

وێنە گەورەکە: هەرێمی کوردستان زیاتر لە ساڵێکە خاوەنی پڕۆژەیەکی گەورە و فراوانی وەک هەژماری منە و نزیکە لەوەی تەواوی فەرمانبەران ببن بە خاوەنی هەژماری بانکی.

 

زانیاریی زیاتر: دژایەتی یەکێتی بۆ ئەو پڕۆژە گرنگەی حکومەت گەیشتووەتە ئاستی تۆمارکردنی سکاڵا لە دادگەی فیدڕاڵی، بەڵام بڕیاردەری فراکسیۆنی پارتی لە پەرلەمانی عێراق دەڵێت: ئەوەی یەکێتی دەیکات بۆ چەواشەکردنی فەرمانبەرانە. 

 

لێدوانی فەرمی: شوان کەلاری، بڕیاردەری فراکسیۆنی پارتی لە پەرلەمانی عێراق دەڵێت: "ئەوەی یەکێتی دەیکات نایاساییە، دڵنیان چ بانکی مەرکەزی و چ حکومەتی عێراق و وەزارەتی دارایی عێراق مامەڵە لەگەڵ حکومەتی هەرێمی کوردستان دەکەن، بۆیە بەداخەوە هێشتا تای هەڵبژاردن بەری نەداون. ئامانجی دادگەی فیدراڵی ئەوەیە سەرجەم موچەخۆرانی عێراق هەژماری بانکیان هەبێت و بابەتەکە لەوە دەرچێت بە قایمە و لیست و پارەی نەقدی مووچە بدرێتە فەرمانبەران".