پێشنیازی گۆڕینی پێنج وەزیر لە حکومەتی سوودانی دەکرێت

ئاڤا نیوز

 

دوای ئەوەی سوودانی نیازی خۆی بۆ ئەنجامدانی گۆڕانکاری وەزاری لە حکومەتەکەیدا ئاشکرا کرد، لیژنەی پلاندانانی ستراتیژیی لە پەرلەمانی عێراق پێشنیازی گۆڕینی پێنج وەزیر دەکات، بەهۆی ئەوەی لە کارەکانیاندا سەرکەوتوو نەبوون.

 

لێدوانی فەرمی: محەممەد ئەلبەلداوی، ئەندامی لیژنەی پلاندانانی ستراتیژیی لە پەرلەمانی عێراق ڕایگەیاند، لیژنەکەیان ڕاپۆرتی خۆی لەبارەی کاری وەزیرەکان تەواوکردووە و ئاراستەی سەرۆکایەتیی پەرلەمانی کردووە، تیایدا پێشنیاز کراوە پێنج وەزیر بگۆڕدرێن، ئەوەش بە ئامانجی ڕووبەڕووبوونەوەی ئەو خاوی و سستییەی لە کارەکانیاندا بینراوە.

 

زانیاریی بەدەستهاتوو: ڕۆژنامەی ئەلعالم ئەلجەدیدی عێراقی بڵاوی کردووەتەوە، گۆڕانکارییەکان وەزیرەکانی بەرگری، پەروەردە، کشتوکاڵ، گواستنەوە و وەزیری نەوت دەگرێتەوە. هۆکاری گۆڕینی حەیان عەبدولغەنی، وەزیری نەوتیش بۆ ئەوە دەگەڕێتەوە کە دۆخی تەندروستی خراپە و وەک پێویست ناتوانێت ئەرکی وەزارەتەکەی ڕایی بکات.

 

زانیاریی زیاتر: ڕۆژنامەکە ئاشکراشی کردووە، پێدەچێت گۆڕینی وەزیری نەوت ڕووبەڕووی ناڕەزایی هاوپەیمانیی دەوڵەتی یاسا بە سەرۆکایەتیی نووری مالیکی ببێتەوە، چونکە حەیان عەبدولغەنی کاندیدی ئەو هاوپەیمانێتییەیە، لەو کاتەشدا لەوانەیە وەزیری ئێستای کارەبای عێراق شوێنی بگرێتەوە.

 

زانیاریی تایبەت: سێ ڕۆژ لەمەوبەر ئاڤا لە ڕاپۆرتێکدا ناوی بەشێک لەو وەزارەتانەی بڵاوکردەوە کە قسە لەبارەی گۆڕینی وەزیرەکانیان دەکرێت، ئەوانیش بریتییبوون لە وەزیرەکانی نەوت، گواستنەوە، پەیوەندییەکان، کشتوکاڵ، سەرچاوەکانی ئاو و پەروەردە.