پارێزگای هەولێر: هیچ هۆکارێک نابینین سبەی بکرێتە پشوو

ئاڤا نیوز

 

پارێزگای هەولێر لەبارەی ڕاگەیاندنی پشوو ڕایدەگەیێنێ، هیچ هۆکارێک بەپێویست نابینن تاوەکو سبەی یەکشەممە بکرێتە پشوو، لە سەرجەم فەرمانگە و دامودەزگاکان دەوام ئاسایی دەبێت و پشوو نابێت.

وێنە گەورەکە: ئەو شەپۆلە بارانبارینەی هەرێمی کوردستانی گرتووەتەوە، پێشبینی دەکرێت لە ئەمشەوەوە تاوەکو سبەی ئێوارە چڕبێتەوە، لە هەندێک شوێن مەترسی کۆبوونەوەی ئاو و لافاو هەیە و بەم هۆیەوە لە چەند ناوچەیەک بەتایبەت لە ناوەندەکانی خوێندن کراوەتە پشوو.

ڕاگەیێنراوی فەرمی: پارێزگای هەولێر ڕایگەیاند، هەموو ئامادەکارییەک و ڕێوشوێنێکی پێویست بۆ وەرزى بارانبارین و زستانى ئەمساڵ گیراوەتەبەر، تەواوی چەپەرەکان، مەنهۆڵەکان، ئاوەڕۆكانی شەقامە گشتییەکان و کوچە و کۆڵانەکانی گەڕەکەکانى سەنتەرى شار و دەرەوەى شار و، کەند و ڕێڕەوەکانى ئاوى سروشتى باران پاک کراونەتەوە.

زانیاریی زیاتر: لە ساڵانی ڕابردوودا بە پاڵپشتی سەرۆکوەزیران مەسرور بارزانی، چەندین پرۆژە بۆ بەرەنگاربوونەوەی مەترسییەکانی ڕوودانى لافاو و هەر ئەگەرێکى نەخوازراو جێبەجێکراون، وەکو دروستکردنی ئاوەڕۆیی لوولەیی، فراوانکردن و پاککردنەوەی ڕێرەى ئاوى سروشتى باران، ئاوى قورس و کەندەکان، دروستکردنی چەندین پۆند و بەنداو، کە بەشێکیان تەوابوونە و بەشێکی تریشیان بە ڕێژەی جیاواز لە بواری جێبەجێکردندان.

خاڵی ئەرێنی: پارێزگای هەولێر هاوڵاتییان دڵنییا دەکاتەوە هەموو ئامادەکارییەکی پێویست کراوە و تیمەکانی فەرمانگە خزمەتگوزارییەکان لە  ئامادەباشیدان بۆ ڕێگریكردن لە ڕوودانی هەر حاڵتێکى نەخوازراو و چارەسەركردنی.

ئەوەی پێویستە بیزانیت: لەبارەی ڕاگەیاندنی پشوو پارێزگای هەولێر ئاماژەی بەوە داوە، هیچ هۆکارێک بە پێویست نابینن تاوەکو سبەی یەکشەممە بکرێتە پشوو، هەموو لایەک ئاگادار دەکەنەوە بەیانی لە سەرجەم فەرمانگە و دامودەزگاکانی سنووری پارێزگای هەولێر دەوام ئاسایی دەبێت و پشوو نابێت.