جووتیارێکی کورد پەتاتەیەک بە کێشی زیاتر لە دوو کیلۆ بەرهەمدەهێنێت

ئاڤا نیوز

 

جووتیارێکی سنووری پارێزگای هەولێر گەورەترین پەتاتەی شیرین بەرهەمدەهێنێت کە کێشیان لەنێوان یەک بۆ دوو کیلۆیە و کێشی  یەکێک لە پەتاتەکانیش کە گەورەترینە دوو کیلۆ و چەند گرامێکە.

 

لێدوانی فەرمی: ئەسکەندەر گاینج، ئەو جووتیارە نموونەییەی شاری هەولێر کە پەتاتەکەی بەرهەمهێناوە بە ئاڤا نیوزی ڕاگەیاند: "ئەمساڵ جۆرێک لە پەتاتەی شیرینم بەرهەمهێناوە کە کێشیان لەنێوان یەک کیلۆ تا دوو کیلۆیە، ئەم جۆرەی پەتاتە ڕێژەی پڕۆتینی زۆرە و کڕیاری تایبەتی هەیە، زیاتر وەرزشکارەکان دەیکڕن".

 

زانیاریی بەدەستهاتوو: جووتیارە نموونەییەکە بەنیاز نییە بەرهەمی ئەمساڵی پەتاتەکەی بفرۆشێت و دەیەوێت بۆ ساڵی ئایندە زیاتری لێ بەرهەمبهێنێت.

 

زانیاریی زیاتر:  نرخی یەک کیلۆ لەو پەتاتە شیرینەی ئەسکەندەر گاینج بەرهەمیهێناوە  12 هەزار دینارە، کە کێشی یەکێک لە پەتاتەکان دوو کیلۆ و چەند گرامێکە.

 

لەلایەکی دیکەوە: ئەسکەندەر گاینج دەڵێت:"یەک کیلۆ پەتای ڕەشم بە 15 هەزار دینار کڕیوە، بەنیازم بۆ ساڵی ئایندە بیچێنم و بەرهەمی زیاترم هەبێت".

 

ئەمەش بزانە: ساڵی 2011 گەورەترین پەتاتە کە کێشی چوار کیلۆ و 98 گرام بوو لە بەریتانیا تۆمار کرا.