لە هەڵەبجە و کەرکووک لافاو چووەتە نێو ماڵانەوە

ئاڤا نیوز

 

لە کاتێکدا کە شەپۆلێکی چڕی بارانبارین هەرێمی کوردستانی گرتووەتەوە، لە چەند ناوچەیەک لافاو دروست بووە و زیانی دارایی هەبووە.

 

وێنە گەورەکە: ماوەی سێ ڕۆژە شەپۆڵێکی چڕی بارانبارین ناوچەکانی هەرێمی کوردستانی گرتووەتەوە، هاوکات لە سنووری هەڵەبجە و کەرکووک لافاو زیانی بە چەند ماڵ و گەڕەکێک گەیاندووە.

 

لە پەیامنێرەوە: دیار محەممەد، پەیامنێری ئاڤا نیوز لە کەرکووک ڕایگەیاند: لافاوەکەی کەرکووک زیانی بە چەند ماڵێک گەیاندووە، لە گەرەکی شۆراو لافاو چووەتە نێو زیاتر لە 25 ماڵەوە، لە گەڕەکی کوردستانیش ئاو چووەتە زیاتر لە پێنج ماڵەوە و زیانی ماددی هەبووە، هاوکات چەند ماڵێک چۆڵکراون و خاوەنەکانیان لە ترسی لافاو نەگەڕاونەتەوە.

 

زانیاریی زیاتر: لە کەرکووک نزیکەی 37 ملیم باران باریوە و ئاستەنگی هاتوچۆی لە ڕێگەی نێوان سلێمانی - کەرکووک دروست کردووە. 

 

لەلایەکی دیکەوە: سەرچاوەیەک لە تیمی بەرگریی شارستانی و ڕووبەڕووبووونەوەی قەیرانەکانی هەڵەبجە بە ئاراس ڕەفیق، پەیامنێری ئاڤا نیوزی ڕاگەیاند: بەهۆی لافاوەوە زیان بەر گەڕەکی تەواری و شەقامی مامۆستایان و شەقامی مامۆستای نەناسراو کەوتووە، زیانەکان نە خەملێنراوە و ئەوەی تا ئێستا زانراوە، لافاو چووەتە نێو حەوت ماڵەوە و زیانی دارایی هەبووە.