نەخۆشخانەی ڕاپەڕینی هەولێر پێنج هێندەی ڕێژەی ئاسایی پێشوازی لە منداڵی نەخۆش دەکات

ئاڤا نیوز

وەرزی پایزە و بەهۆی گۆڕانی کەشوهەواوە پەتایەکی قورسی وەرزی بڵاوبووەتەوە. بەڕێوەبەری نەخۆشخانەی ڕاپەڕینی هەولێر دەڵێت، ڕۆژانە زیاتر لە پێنج هێندەی ڕێژەی ئاسایی پێشوازی لە منداڵی نەخۆش دەکرێت.

وێنە گەورەکە: هەولێر یەک نەخۆشخانەی حکومی تایبەت بە منداڵانی هەیە، جگە لە ناوخۆی هەولێر، لە دەوروبەری هەولێر و شارەکانی دیکەش سەردانی نەخۆشخانەی ڕاپەڕین دەکەن. بەوتەی بەڕێوەبەری نەخۆشخانەکە، بەلای کەمەوە هەولێر دوو تاوەکو سێ نەخۆشخانەی دیکەی هاوشێوەی نەخۆشخانەی ڕاپەڕینی پێویستە.

لێدوانی تایبەت: د. مەحموود محەممەد، بەڕێوەبەری نەخۆشخانەی ڕاپەڕینی هەولێر بە ئاڤای ڕایگەیاند، ئەم پەتا وەرزییە نەخۆشییەکی ئاساییە و هەموو ساڵێک لەگەڵ هاتنی وەرزی پایز و زستان دەستپێدەکات، بەڵام ڕۆژانە 600 تاوەکو 800 منداڵی نەخۆش سەردانی بەشی ڕاوێژکاریی نەخۆشخانەی ڕاپەڕین دەکەن، ڕێژەی هەرە زۆریان بەهۆی پەتای وەرزییەوە سەردانی نەخۆشخانەکە دەکەن.

بەڕێوەبەری نەخۆشخانەی ڕاپەڕین دەشڵێت، "هەر چەندە لە بەشی فریاکەوتن 80 شوێنمان بۆ مانەوە هەیە، بەڵام بە بەردەوامی و بە نزیکەیی دوو هێندەی ڕێژەی ئاسایی جێگا بۆ منداڵی نەخۆش دەکەینەوە.