بەهۆی خواردنی خۆراکی خۆڕاییەوە، هەزاران کەس لە ئێندۆنیزیا ژەهراویبوون

ئاڤا نیوز

11 هەزار کەس لە ئێندۆنیزیا بە هۆی خواردنەوە ژەهراویبوون و نیوەی حاڵەتە تۆمارکراوەکانیش بۆ بەرنامەیەکی حکومەتی ئەو وڵاتە دەگەڕێنرێنەوە، کە خۆراک بێبەرامبەر بەسەر خەڵکدا دابەش دەکات.

چیرۆکی سەرەکی: دەستنەکەوتنی خۆراک بەپێی پێویست، یەکێکە لە کێشە گەورەکانی ئێندۆنیزیا و حکومەتی ئەو وڵاتە بۆ چارەسەرکردنی ئەم کێشەیە 14 هەزار چێشتخانەی گەورەی کردووەتەوە و لە ماوەی نۆ مانگدا بێبەرامبەر خۆراکی گەیاندووەتە 41 ملیۆن کەس.

زانیاریی بەدەستهاتوو: دادان هیندایانا، سەرۆکی دامەزراوەی چاودێری بەرنامە خۆراکییەکە بە ئاژانسی فرانس پرێنس'ی ڕاگەیاندووە لە دەسپێکی ئەم بەرنامەیەوە زیاتر لە 11 هەزار کەس بە خۆراک ژەهراوی بوون و 600 کەس ڕەوانەی نەخۆشخانە کراون.

بە تەنیشت ئەم بابەتەوە: دادان هیندایانا باس لەوە دەکات لە کۆی 441 حاڵەتی ژەهراویبوون بە خۆراک، هۆکاری 211 حاڵەت کە دەکاتە لە سەدا 48 ڕاوستەوخۆ بۆ خواردنی ئەو خۆراکانە دەگەڕێتەوە حکوومەت بێبەرامبەر گەیاندوونیەتە خەڵک و دەڵێت: بە هۆی خواردنی خۆراکی بێبەرامبەر، 660 قوتابی لە دوو قوتابخانەی ویلایەتی جاڤای ناوەڕاست تووشی سکچوون، دڵتێکەڵهاتن و سەرسووڕان بوون.

ئەوەی پێویستە بیزانیت: پرابۆوۆ سوبیانتۆ، سەرۆکی ئێندۆنیزیا نکۆڵی لەوە دەکات کە هۆکاری ژەهراویبوون بە خۆراک بۆ بەرنامەکەیان بگەڕێتەوە و دەڵێت: ژمارەی حاڵەتە تۆمارکراوەکان زۆر لەو بەشە خۆراکانە کەمترە کە گەیەنراوەتە خەڵک. زۆربەی وڵاتان ستایشی بەرنامەکە دەکەن. 

لە لایەکی دیکەوە: حکومەتی ئێندۆنیزیا دەیەوێت تا کۆتایی ئەمساڵ خۆراک بگەیەنێتە 82 ملیۆن و 900 هەزار کەس ئەمەش دەکاتە نزیکەی یەک لەسەر سێی دانیشتووانی ئەم وڵاتە.

زانیاریی زیاتر: زۆربەی ئەوانەی لە خۆراکی بێبەرامبەر سوودمەندبوون منداڵ، منداڵی ساوا، ژنانی دووگیان و دایکانی شیردەرن. حکومەت لە بەرنامەیدا بۆ ساڵی داهاتوو خۆراکی بێبەرامبەر بگەیەنێتە بەساڵاچووان و خاوەن پێداویستییە تایبەتەکانیش.