لە کۆیە سێ کەس بەهۆی کێڵانی زەوی دەستگیر دەکرێن

ئاڤا نیوز

 

هێزە ئەمنییەكانی كۆیە بەتۆمەتی كێڵانی زەوی لە ماوەی دوو هەفتەدا سێ کەس لە خانەوادەیەک دەستگیر دەكەن .

 

چیرۆكی سەرەكی: حەوێز حەمەد، جووتیارێكی خەڵكی گوندی سماقوڵی گەلییە لە سنووری قەزای كۆیە، دوای ئەوەی زەوییەكەی خۆی بەمەبەستی کاری كشتوكاڵی دەكێڵێت، دوو هەفتە پێش ئێستا هێزە ئەمنییەكان بەتۆمەتی زێدەڕۆییكردنە سەر زەوییەکانی حكومەت دەستگیری دەكەن، پاش ئەوە، كەیفی حەمەد، كە برای حەوێز حەمەدە بۆ ئازادكردنی براكەی سەردانی دادگا و پۆلیس و هێزە ئەمنییەكانی دیكە دەكات، ڕۆژی پێنجشەممەی ڕابردوو ئەویش بە هەمان تۆمەت دەستگیر دەكرێت.

 

زانیاریی زیاتر: دوای دەستگیرکردنی باوکی و مامی، دەرباز كەیفی لە فەیسبووكی خۆی چەند نووسینێك بڵاو دەكاتەوە و دەڵێت: "دادگای كۆیە و داواكاری گشتی بە ئارەزووی خۆیان یاسا دەردەكەن، داوا لە خەمخۆرانی یاسا دەكەم سنوورێك بۆ ئەو بێڕێزییە دابنێن"، دوای بڵاوكردنەوەی ئەو نووسینە هێزە ئەمنییەكانی كۆیە ئەویش دەستگیر دەكەن.

 

لێدوانی فەرمی: كەسێكی نزیك لە خانەوادەی دەرباز كەیفی كە ناوی لای ئاڤا نیوز پارێزراوە، ڕایگەیاند: "ئەو سێ كەسە لە خانەوادەكەمان بە ناحەق و بێ هیچ بەڵگەیەك دەستگیر كراون، هۆكارەكە تەنیا ئەوەیە كە زەوی خۆمان لە سنووری گوندەکە كێڵاوە بەمەبەستی کشتوکاڵکردن".

 

خانەوادەی دەستگیرکراوەکان لە هەوڵدان بۆ ئازادكردنیان، بەڵام تاوەكو ئێستا هیچ ئەنجامێكی نەبووە، سەرچاوەکەی ئاڤا گوتیشی: "چەندینجار داوامان كردووە لیژنەی تایبەتمەند بێت و لە بابەتەكە بكۆڵێتەوە كە ئەو زەوییانە موڵكی جووتیارانن نەك هی حكومەت، بەڵام لەبری ناردنی لیژنە، دەستگیرمان دەكەن".

 

بۆچوونی بەرامبەر: لەسەر ئەم بابەتە ئاڤا نیوز چەند جارێك پەیوەندیی بە عەمید عەلی عەبدوڵڵا، بەڕێوەبەری پۆلیسی كۆیە كرد، بەڵام وەڵامی پەیوەندییەكانی نەدایەوە.