مونا قەهوەچی دەنگۆی بەشدارینەكردنی توركمان لە حكومەت ڕەتدەكاتەوە

ئاڤا نیوز

 

مونا قەهوەچی، جێگری سەرۆكی پارتی چاكسازیی توركمانی دەنگۆی بەشدارینەكردنی پێكهاتەی توركمان لە كابینەی 10ی حكومەتی هەرێمی كوردستان ڕەتدەكاتەوە.

 

لێدوانی فەرمی: مونا قەهوەچی بە ئاڤا نیوزی ڕاگەیاند: دەنگۆیەك لە تۆڕە كۆمەڵایەتییەكان بڵاوبووەتەوە، گوایە پێكهاتەی توركمان بەشداری لە كابینەی 10ی حكومەتی هەرێمی كوردستان ناكات، ئەو دەنگۆیە ڕەتدەكەینەوە و هەر هەواڵێك لەو چوارچێوەیە بڵاوكرابێتەوە دوورە لە ڕاستییەوە.

 

لەلایەكی دیكەوە: قەهوەچی، هاوكات كاندیدی دەرچووی هەڵبژاردنی خولی شەشەمی پەرلەمانی كوردستانە لە پێكهاتەی توركمان ڕاشیگەیاند: بەشدارییەکی کارای پێکهاتەی تورکمان وەک نەتەوەی دووەم لە هەرێمی کوردستان لە کابینەی حکومەت زۆر گرنگە و ئامادەیی ئێمە لە سیستەمی حکومرانی و سیاسی هەرێمی کوردستان پێگەی هەرێمی كوردستان و تابلۆی پێکەوەژیانی ئاشتیانەی نێوان پێکهاتەکان جوانتر و بەهێزتر دەکات.

 

ئاماژەی بەوەش کرد، "لە ڕۆژانی داهاتوودا داواکارییەکانی پێکهاتەی تورکمان بە فەرمی بە شاندی دانوستانکاری لیستی زۆرینەی پەرلەمانی رادەگەیێنین".