367 ئاوارەی دیكەی شنگال دەگەڕێنەوە زێدی خۆیان

ئاڤا نیوز

 

367 ئاوارەی دیكەی شنگال گەڕانەوە زێدی خۆیان و هاوكاری داراییان پێشكەش دەكرێت.

 

چیرۆكی سەرەكی: وەزارەتی كۆچ و كۆچبەرانی عێڕاق گەڕانەوەی 367 ئاوارەی دیكەی كوردی ئێزدی بۆ زێدی خۆیان لە شنگال ڕاگەیاند، كە لە كەمپەكانی پارێزگای دهۆك نیشتەجێن.

 

وێنە گەورەكە: حكومەتی فیدراڵی عێڕاق بە هەماهەنگی حكومەتی هەرێمی كوردستان، هەوڵی داخستنی سەرجەم كەمپەكانی هەرێمی كوردستان و گەڕانەوەی ئاوارەكان بۆ شوێنی خۆیان دەدات، كە ئێستا 34 كەمپ ماون و حكومەتی هەرێمی كوردستانیش نایەوێت بەزۆر ئاوارەكان بگەڕێندرێنەوە زێدی خۆیان.

 

ڕاگەیێنراوی فەرمی: وەزیری كۆچ و كۆچبەرانی عێراق "ئیڤان فایەق" لە بەیاننامەیەكدا ڕایگەیاند: بە هەماهەنگی لەگەڵ دەزگا پەیوەندیدارەكانی حكومەتی هەرێمی كوردستان و بەرپرسانی یەكە كارگێڕییەكانی پارێزگای دهۆك و بە هاوكاری ڕێكخراوی كۆچی نێودەوڵەتی (IOM)، 367 ئاوارەی دیكەی كوردی ئێزدی كە نیشتەجێی كەمپی (مام ڕەشان) بوون لە پارێزگای دهۆك، گەڕانەوە زێدی خۆیان لە شنگال.

 

ئەوەش بزانە: هەر ئاوارەیەكی نیشتەجێی كەمپەكان، لە كاتی گەڕانەوەیان بۆ زێدی خۆیان، هاوكاری ماددی دەكرێن و لەلایەن وەزارەتی كۆچ و كۆچبەرانی عێراقەوە بڕە پارەیەكیان پێدەدرێت و پێداویستی سەرەكیی بژێوییان بۆ دابین دەكرێت.

 

باکگراوند: ڕۆژی سێی ئابی 2014 چەکدارانی ڕێکخراوی تیرۆرستی "داعش" هێرشیان بۆ سەر دەڤەری شنگال دەستپێکرد و بەهۆیەوە 400 هەزار خێزان ئاوارەی هەرێمی کوردستان و پارێزگای نەینەوا بوون.