کاریگەریی هەڵبژاردنی ئەمریکا لەسەر هەرێمی کوردستان؛ ستراتیژی واشنتن دەگۆڕێت؟

ئاڤا نیوز

ساڵ بە ساڵ و قۆناغ بە قۆناغ پەیوەندییەکانی هەرێمی کوردستان و ئەمریکا هەنگاوی بەرەو باشتر و پێشتری ناوە، خاڵی گرنگ ئەوەیە لە ڕابردوودا سەرۆکی ئەمریکا لە دیموکراتەکان یان کۆمارییەکان بووبێت، هیچ لەو ستراتیژە نەگۆڕاوە کە ئەمریکا و هەرێمی کوردستانی پێکەوە گرێداوە.

وێنە گەورەکە: ڕەگوڕیشەی پەیوەندییەکانی نێوان ئەمریکا و هەرێمی کوردستان دەگەڕێتەوە بۆ شەستەکانی سەدەی ڕابردوو، ئەوکاتەی کورد شۆڕشی دژ بە داگیرکاری و دیکتاتۆریی بەعس دەستپێکرد. دواتر لە ساڵی 1992ـەوە کە حکومەتی هەرێمی کوردستان دامەزرا، پەیوەندییەکان شێوازێکی فەرمییان بەخۆوە بینی. 

زانیاریی زیاتر: لەدوای 2003 و ڕووخانی ڕژێمی بەعس، پەیوەندیی نێوان ئەمریکا و هەرێمی کوردستان زیاتر پەرەیسەند و ڕەهەندی سەربازی و ئەمنی زیاتری بەخۆوە بینی، ئەمەش زیاتر لەبەر هاوکارییەکانی نێوان پێشمەرگە و سوپای ئەمریکا لە ڕووخاندنی بەعس و دواتریش لە ڕووبەڕووبوونەوەی تیرۆریستان و پاشانیش لە تێکشکاندانی داعشدا.

پێدراوە ڕاستەکان: ئێستا گەورەترین کونسوڵخانەی ئەمریکا لەسەر ئاستی جیهان لە هەولێرە. هەرێمی کوردستانیش لە واشتنن نوێنەرایەتییەکی بەهێزی هەیە.  هەردوولا لە پەیوەندییەکدان کە بە هاوبەشیی ستراتیژی ناودەبرێت.

لێدوانی فەرمی: بەیان سامی عەبدولڕەحمان، ڕاوێژکاری سەرۆکوەزیرانی هەرێمی کوردستان بۆ کاروباری دەرەوە و ژینگە بە ئاڤا نیوزی گوت: "دۆستایەتیی نێوان ئێمە و ئەمریکا زۆر گرنگە، لە دوای سەردانەکەی ئەمساڵی سەرۆکوەزیران مەسروور بارزانی بۆ ئەمریکا، ئەم پەیوەندییانە چوونە قۆناغێکی نوێوە و پەرەی زیاتر بە پەیوەندییە ئابووریی و ئەمنییەکانی نێوان هەردوولا درا". 

بابەتی ستراتیژی: بەشێکی گرنگی پەیوەندییەکانی نێوان ئەمریکا و هەرێمی کوردستان ئەو پابەندییە ستراتیژییەی ئەمریکایە کە لە بەرامبەر پاراستنی هەرێمی کوردستان هەیەتی، ئەمەش لە پەیوەندییەکانی نێوان سوپای ئەمریکا و هێزەکانی پێشمەرگە بە ڕوونی بەدیار دەکەوێت. 

 

ئەو مانایەی دەگەیێنێت: بە درێژایی ساڵانی ڕابردوو، هەرێمی کوردستان پەیوەندییەکی جێگیر و بەهێزی لەگەڵ سەرجەم حکومەتەکانی ئەمریکا هەبووە و کابینەی هەریەک لە کۆمارییەکان و دیموکراتەکان بە بایەخەوە لە پێگەی هەرێمی کوردستانیان ڕوانیوە.