جیاوازیی نێوان هەڵبژاردنی کوردستان و ئەمریکا چییە؟

ئاڤا نیوز

 

شاندێكی كۆمیسیۆنی هەڵبژاردنەكانی هەرێمی كوردستان ئێستا لە ویلایەتە یەكگرتووەكانی ئەمریكان و چاودێریی هەڵبژاردنی سەرۆكایەتیی ئەمریكا دەكەن.

 

وێنە گەورەکە: زیاتر لە دوو هەفتەیە هەڵبژاردنی پەرلەمانی کوردستان کوردستان بەڕێوەچوو، ئەمڕۆش هەڵبژاردنی گشتی بۆ سەرۆکایەتی ئەمریکا لە ویلایەتە یەکگرتووەکانی ئەمریکا دەستی پێکرد، شرۆڤەکارێکی کوردستان بۆ هەڵبژاردن کە لەگەڵ شاندی کۆمیسیۆنی کوردستان لە ئەمریکایە، جیاوازیی نێوان هەڵبژاردنی کوردستان س ئەمریکا دەخاتەڕوو.

لێدوانی فەرمی: كاروان جەلال، ئەندامی شاندی كۆمیسیۆنی هەڵبژاردنەكانی هەرێمی كوردستان لە ئەمریكا بە ئاڤا نیوزی ڕاگەیاند: هەڵبژاردنی سەرۆكایەتیی ئەمریكا لە كەشێكی ئارام بەڕێوەدەچێت و بەردەوامە، ڕێككارەكانی دەنگدان لەنێوان ویلایەتەكانی ئەمریكا جیاوازە و سەردانی ژمارەیەك بنكەی دەنگدانمان لە چەند ویلایەتێكی جیاواز كردووە، دوای داخستنی بنكەكان لە كاتێكی زوودا ئەنجامەكانیش ڕادەگەیێنرێن.

 

لەلایەكی دیكەوە: كاروان جەلال ڕاشیگەیاند: هەڵبژاردن لە ویلایەتە یەكگرتووەكانی ئەمریكا جیاوازە، لە سەرجەم وڵاتان تایبەتمەندیی خۆی هەیە، لە یەك كاتدا دەنگدەر جگە دەنگدان بە كاندیدی سەرۆكایەتیی ئەمریكا، بەشداریی لە چەند ڕاپرسییەكیش دەكات، سەرجەم پرۆسەكە لەنێو یەك پسولەی دەنگدانە.

 

زانیاریی زیاتر: لەنێو پسولەكە دەنگدەر دەنگ بە دەستوورێكی تایبەت بە ویلایەتەكەی دەدات، هاوكات ستافی قوتابخانەكەشی هەڵدەبژێرێت.

 

ئەوەی پێویستە بیزانیت: دەزگای سەرپەرشتیاری هەڵبژاردن لە ئەمریكا لە گفتوگۆی ئەوەدایە كە چۆن لە داهاتوودا لەڕێگەی ژیریی دەستكردەوە پرۆسەكە بەڕێوەببرێت و بەشداریی بكرێت، بە مەرجێك كاریگەریی نەخاتە سەر ئەنجامی هەڵبژاردن، ئەمەش بۆ ئەوەی هیچ وڵاتێك نەتوانێت لەڕێگەی هێرشی ئەلیكترۆنییەوە دەستوەردان لە پرۆسەكە بکات.

 

ئەوەش بزانە: بەپێی گوتەی كاروان جەلال، جیاوازییەكی دیكەی هەڵبژاردنی ئەمریكا ئەوەیە كە هەر ویلایەتێك كۆمیسیۆنێكی تایبەت بە خۆی هەیە، لە هەندێك لە ویلایەتەكان دەنگدەر پێویستی بە ناسنامەش نییە بیبات بۆ بنكەی دەنگدان، بەڵكو ناوی لە بنكەكە هەیە و ڕاستەوخۆ دەنگ دەدات.