عەرەب و تورکمان سکاڵاکەیان لەبارەی حکومەتی خۆجێیی کەرکووک کشاندەوە

ئاڤا نیوز

 

سەرۆکی بەرەی تورکمانی عێراق ڕایگەیاند، بەهۆی ئەوەی ناکرێت یەک سکاڵا لەسەر حکومەتی خۆجێیی کەرکووک لە دادگای فیدراڵی و دادگای کارگێڕییش سەیر بکرێت و بڕیاری لەسەر بدرێت، بۆیە تورکمان و بەشێک لە پێکهاتەی عەرەبی سکاڵا هاوبەشەکەیان لە دادگای فیدراڵی کشاندەوە.

 

وێنە گەورەکە: بەگوێرەی یاسای ئەنجوومەنی پارێزگاکانی عێراق، پێویستە لە بەڕێوەبردنی پارێزگای کەرکووک بە سازانی هەرسێ پێکهاتەی کورد و تورکمان و عەرەب بڕیار بدرێت، بەرەی تورکمانی پێیوایە پەراوێزخستنیان لە ئیدارەی نوێی کەرکووک، پێچەوانەی ماددەی 13ی ئەو یاسایەیە، بۆیەش مانگی ئابی ئەمساڵ لەگەڵ بەشێک لە پێکهاتەی عەرەبی سکاڵایان لە دادگای فیدراڵی تۆمارکرد.

 

لێدوانی فەرمی: حەسەن تۆران، سەرۆکی بەرەی تورکمانی عێراق بە ڕۆژنامەنوسانی ڕاگەیاند، "سەبارەت بەو دۆسیەیەی لە دادگای فیدراڵی تۆمارمانکردبوو دژی پێکهێنانی حکومەتی ناشەرعی و نایاسایی کەرکووک، ئێمە وەک تورکمان و پێکهاتەی عەرەبی لە هەردوو دادگای فیدراڵیی و دادگای کارگێڕیی سکاڵامان تۆمارکردبوو، دادگای کارگێڕیش بڕیاریداوە 24ی ئەم مانگە لەبارەی سکاڵاکان کۆببێتەوە".

 

سەرۆکی بەرەی تورکمانی وتیشی، دوای ڕاوێژ لەگەڵ یاساناسان و ڕاوێژکاران، هەردوولا بڕیاریاندا سکاڵاکانیان لە دادگای فیدراڵی بکشێننەوە تا دوو دادگای جیاواز لەبارەی یەک سکاڵا بڕیار دەرنەکەن، ئەوەش پەشیمان بوونەوە نییە لە سکاڵاکەیان، بەڵکو خۆیان داوایانکرد سکاڵاکەیان هەڵبوەشێنرێتەوە تا تێکگیران لە بڕیارەکان دروستنەبێت.