ئومێد خۆشناو: ئەو زەوییانەی دابەش دەكرێن لە باشترین شوێنی هەولێرن

ئاڤا نیوز 

 

لە سەرۆكایەتیی شارەوانیی هەولێر، تیروپشک بۆ سێ هەزار پارچە زەوی كرا بۆ ئەوەی بەسەر سێ هەزار فەرمانبەر دابەش بكرێن.

 

وێنە گەورەکە: ماوەیەکە پرۆسەی دابەشکردنی زەوی دەستیپێکردووە، زیاتر لە 200 هەزار فەرمانبەر و خانەنشین لە بڕیارەکە سوودمەند دەبن و تاوەکو ئێستا  نزیکەی 12 هەزار وەریانگرتووە، قۆناغ بە قۆناغیش فەرمانبەرانی دیکە وەری دەگرن.

 

لێدوانی فەرمی: ئومێد خۆشناو، پارێزگاری هەولێر لە كۆنفڕانسێكی ڕۆژنامەوانیدا ڕایگەیاند، شوێنی ئەو زەوییانەی لە سنووری هەولێر بەسەر فەرمانبەران دابەش دەكرێن، یەكێكە لە باشترین شوێنەكانی هەولێر كە دەكەوێتە سەر ڕێگای هەولێر - دهۆك و دەكەوێتە سنووری ماستەرپلانی هەمواركراوی هەولێر.

 

پارێزگاری هەولێر ئاماژەی بەوەشدا، لەو شوێنە شارێكی مۆدێرن دورست دەكرێت و سەرجەم خزمەتگوزارییەكان دابین دەكرێن، خاڵی گرنگ ئەوەیە زۆر بەئاسانی تۆڕی ئاوی خواردنەوە بەو گەڕەكە دەگات.

 

زانیاریی زیاتر: بەپێی نەخشەی گەڕەكەكە، شەقامی 30 مەتری و 20 مەتریی تێدایە و كەمترین شەقامی كۆڵانەكانی گەڕەكەكە 12 مەترییە.

 

ئەوەش بزانە: ئەو سێ هەزار فەرمانبەرەی ئەمڕۆ زەوییان پێدەدرێت، فەرمانبەری وەزارەتەكانی پلاندانان و كارو كاروباری كۆمەڵایەتیی و پەرلەمانی كوردستانن.