ئاڤا بەدواداچوون بۆ کێشەی دەرچووانی زانکۆکانی سنووری ماددەی 140 دەکات

ئاڤا نیوز

 

سەدان دەرچووی چەند زانکۆ و کۆلیژێکی سنووری ماددەی 140 ناڕەزایی دەردەبڕین کە لەلایەن وەزارەتی خوێندنی باڵا و توێژینەوەی زانستی هەرێمی کوردستان دان بە بڕوانامەکانیان نانرێت.

 

 

چیرۆکە سەرەکیەکە: ڕۆژی چوارشەممە، سەدان دەرچووی زانکۆکانی قەڵەم و کتاب لەڕێگەی ئاڤا میدیاوە داوایان کرد دەنگیان بە وەزارەتی خوێندنی باڵا و توێژینەوەی زانستی بگەیەنین، دوای ئەوەی بەدواداچوون کرا دەرکەوت، تەنیا ئەو دوو زانکۆیە نین کە دان بە بڕوانامەکانیان نانرێت، بەڵکو هەریەکە لە زانکۆکانی قەڵەم، کتاب، نوور و حەدبا، هەروەها لقی زانکۆکانی ئیمام کازم و ئیمام جەعفەر دەگرێتەوە. لەبەرامبەردا بەغدا هەڕەشەی ئەوە دەکات ئەگەر هەرێمی کوردستان دان بە بڕوانامەی ئەو زانکۆیانە نەنێت، ئەوانیش ئیعتیرافکردن بە زانکۆ تایبەتەکانی هەرێمی کوردستان هەڵدەوەشێننەوە.

 

هۆکارە زانراوەکان: وەزارەتی خوێندنی باڵا و توێژینەوەی زانستی چەند هۆکارێکی دەستنیشانکردووە کە دان بە بڕوانامەی ئەو زانکۆیانە نانێت ئەوانیش، ئەو زانكۆیانە پابەندی ئەو ڕێسا و ڕێنماییە نین کە زانکۆکانی هەرێمی كوردستان پەیڕەوی دەکەن، هاوکات دەوامكردنی قوتابیان لەو زانكۆیانە زۆر لاوازە و قوتابی بە ئارەزووی خۆی دەوام دەكات و لە وانەكان ئامادە دەبێت. لەلایەکی دیکەوە، قوتابی لە بەشە بەرزەكانی خوێندن بە نمرەیەكی زۆر كەم لەو زانكۆیانە وەردەگیرێت.

 

لەلایەکی دیکەوە: گەشاو خالید، گوتەبێژی زانکۆکانی کیتاب و قەڵەم بە ئاڤا میدیای ڕاگەیاند: ساڵانە بەرزترین و نزمترین کۆنمرەی وەرگرتنی قوتابیان لە زانکۆکانیان لەلایەن وەزارەتی خوێندنی باڵای عێراقەوە دیاری دەکرێت نەوەک ئەوان، ئەوەش ڕاست نییە کە قوتابیان بە ئارەزووی خۆیان دەوام دەکەن، بەڵکو هەر قوتابییەک غیاباتی زۆر بێت فەسڵ دەکرێت.

 

نووسراوی فەرمی: ئاڤا نووسراوێکی فەرمی ئەنجوومەنی وەزیرانی دەستکەوتووە، د. ئومێد سەباح، سەرۆکی دیوان ڕێککەوتی 27-9-2020, واتە چوار ساڵ پێش ئیستا نووسراوی بۆ وەزارەتی خوێندنی باڵا و توێژینەوەی زانستی هەرێمی کوردستان کردووە، ڕەزامەندی دەربڕیوە دان بە بڕوانامەی دەرچووانی ساڵی خوێندنی 2014-2015 بنرێت.

 

بۆ دەرچووانی ساڵانی دواتر، ئەنجوومەنی وەزیران داوای کردووە لەگەڵ وەزارەتی خوێندنی باڵای عێراق تاوتوێ ئەم بابەتە بکەن و چارەسەرێکی گونجاوی بۆ بدۆزنەوە، بەڵام تاوەکو ئێستا هیچ هەنگاوێکی کرداری نەنراوە و بێدەنگی لەم بابەتە کراوە.