حەسەن شەریف سترانەکێ لسەر عیسێ دەلا تۆمار دکەت

ئاڤا میدیا 

 

هونەمەندێ دیار حەسەن شەریف، مژیلی تۆمارکرنا سترانەکا نوییە و دبێژیت، ستران لسەر داستانا عیسێ دەلایە و ئاوازا وێ سترانێ ژی وی بخۆ چێکرییە.

 

عیسێ دەلا کی بوو؟

 

عیسێ دەلا، شارەزا، زانا، هۆشمەند و ناڤدارەکێ کوردێ سەردەمێ خۆ بوو ل میرگەها ئامێدیێ (بەهدینان)، چەند سالان شیرەتکارێ میرێن میرگەهێ بوویە، عیسێ دەلا خەلکێ گوندێ جمکێ دەلایە ژ ئێلا سندییا یا سەر ب دەڤەرا زاخۆڤە، نوکە سێ شوونوارێن بناڤێ وی ل ئامێدیێ هەنە، ئەو ژی پێکدهێن ژ مزگەفتا عیسێ دەلا، پرا عیسا دەلا و ئاشێ عیسێ دەلا.

 

"میوزیکا سترانێ سێ بۆ چار جاران دهێتە گۆهڕین"

 

"ژبەرکو ڤێ داستانێ دیرۆکەکا کویر و دوویر هەیە و ئەو دیرۆکە ژی یا گەلێ مەیە ل هەر جهەکێ بیت گرنگیا خۆ هەیە، لێ ب تایبەت دەڤەرا بەهدینان و ئامێدیێ ئەڤە تشتەکێ تایبەتە بۆ مە، ئاوازا وێ سترانێ من بخۆ چێکرییە، میوزیکا وێ ژی سێ بۆ چار جاران دێ هێتە گۆهڕین، پشتی ماندیبوونەکا درێژ ئەم شیاین بگەهینە وی ئەنجامی کو میوزیک و ئاوازا وێ سترانێ وەسا چێبکەین". هونەرمەند حەسەن شەریف، بۆ ئاڤا میدیا ئەڤ چەندە گوت.

 

ل کیڤە کار لسەر سترانێ هاتیە کرن؟

 

"ب هاریکاریا هونەرمەند و میوزیسیەن هاروون ئەلکی ل ستەنبولێ کار لسەر ڤێ سترانێ هاتیە کرن، ئامیرێن رەسەن و کەڤنارێن کوردەواری لسەر بنگەهەکێ مودێرن و خۆش تێدا هاتینە بکارئینان". ئەڤە ژی هەر ب گوتنا هونەرمەند حەسەن شەریف.

 

زانیارێن زێدەتر لسەر سترانێ

 

پەیڤێن وێ سترانێ یێن ئەدیب چەلکی نە، ستران نێزیک بوویە ژ دوماهیێ، بەشەکێ زۆرێ کارێن وێ هاتینە کرن، لێ هێشتا چ بڕیار نەهاتینە دان بۆ کلیپکرنا وێ.