باڵیۆزی ئەمریکا: لە پشتیوانی ئاسایش و سەروەریی عێراق بەردەوام دەبین

ئاڤا نیوز

 

باڵیۆزی ئەمریکا لە بەغدا دەڵێت، وڵاتەکەی لە پشتیوانیکردنی ئاسایش و پاراستنی سەروەری عێراق بەردەوام دەبێت و دەشیانەوێت گەلی عێراق لە هەموو بوارەکانی ڕێكکەوتنی چوارچێوەی ستراتیژیی سوودمەند ببێت.

 

وێنە گەورەکە: عێراق و ئەمریکا بڕیاریانداوە پەیوەندییەکانی نێوانیان لە ئەمنییەوە بۆ بوارەکانی دیکەش فراوان بکەن، بەڵام پێشمەرجی هەندێک لایەنی عێراق بۆ کشانەوەی هەموو هێزە بیانییەکان، وەک ئاستەنگییەک بۆ بەرەوپێشبردنی پەیوەندییەکان لەقەڵەم دەدرێت.

 

ڕاگەیێنراوی فەرمی: ئەلینا ڕۆمەناوسکی، باڵیۆزی ئەمریکا لە عێراق ڕایگەیاند: لە کۆبوونەوەیدا لەگەڵ نووری مالیکی، سەرۆکی هاوپەیمانی دەوڵەتی یاسا باسیان لە داهاتووی عێراق و چۆنیەتی سوود وەرگرتنی گەلی عێراق کردووە لە ڕێککەوتنی گشتگیریی نێوان بەغدا و واشنتن، "ئێمەش پابەندین بە پشتیوانیکردن لە عێراقێکی ئارام، سەقامگیر و خاوەن سەروەری".

 

لەلایەکی دیکەوە: نووسینگەی سەرۆکی هاوپەیمانی دەوڵەتی یاسا لەبارەی کۆبوونەوەکەوە دەڵێت، مالیکی جەختی لەوەکردووەتەوە کە لەگەڵ دەستبەکاربوونی ئیدارەی نوێی ئەمریکا لەسەرەتای ساڵی نوێدا، پێویست دەکات پەیوەندییەکانی نێوان عێراق و ئەمریکا زیاتر بەهێزبکرێن و بە گوێرەی ڕێكکەوتنی چوارچێوەی ستراتیژیی گەشەی زیاتر بەو پەیوەندییانە بدرێت.