لە پرۆسەی سەرژمێریی ناوچە "پەراوێزخراوەکان" ئاشکرا دەکرێن

ئاڤا نیوز

 

ئەو سەرژمێرییەی بڕیارە کۆتایی ئەم هەفتەیە لە عێراق و هەرێمی کوردستان ئەنجام بدرێت، ناوچە و پارێزگا "پەراوێزخراوەکان" ئاشکرا دەکات و وەک چاودێرانیش دەڵێن، پێدەچێت گۆڕانکاری سیاسیش بەدوای خۆیدا بهێنێت.

 

لێدوانی فەرمی: غالب دەعمی، چاودێری سیاسی عێراقی بە ئاڤا میدیای ڕاگەیاند، ئێستا هەندێک ناوچە و شار هەن کە لەڕووی خزمەتگوزارییەوە پەراوێزخراون و هەندێک ناوچەش مافی زیاتریان لەوانی دیکە پێدراوە، بەتایبەت لە پارێزگاکانی باشوور و ناوەڕاستی عێراق ئەو بابەتە زیاتر هەستی پێدەکرێت، بۆیە سەرژمێریی جگە لەوەی ئەو بابەتە ڕاستدەکاتەوە، هاوکات بەهۆیەوە گۆڕانکاری لە کورسییەکانی پەرلەمان و ئەنجوومەنی پارێزگاکاندا دەکرێت.

 

بەوتەی ئەو چاودێرە، دوای سەرژمێریی قەبارەی پێکهاتەکانی عێراق و نوێنەرایەتی ڕاستەقینەیان دەردەکەوێت، هاوکات بەهۆیەوە حکومەت زانیاری تەواوی لەسەر ژمارەی گەنجان، بێکاران، ڕێژەی هەژاری، کەمی خزمەتگوزارییەکان، لەوانەش بنکەی تەندروستی، کارەبا، قوتابخانە و ئامێرە کارەباییەکان لەهەر ماڵێکدا لەبەردەستدەبێت.

 

لەلایەکی دیکەوە: ئەحمەد یاسری، سەرۆکی ناوەندی عەرەبی بۆ توێژینەوەی ستراتیژیی بە ئاڤا میدیای ڕاگەیاند، پرۆسەی سەرژمێریی هاوشێوەی پەسەندکردنی دەستوور لە ساڵی 2005دا، سەرکەوتنی پەیوەستە بە کاری وەزارەتەکان و حکومەت و قبوڵکردنی ئەنجامەکانی لەلایەن عێراقییەکانەوە.

 

وتیشی، لەناوچەکانی سنووری ماددەی 140 جۆرێک لە لێکتێگەیشتن بۆ سەرکەوتنی پرۆسەی سەرژمێریی هەیە، جەختیش دەکاتەوە کە سەرژمێریی کاریگەری ئەرێنی لەسەر دۆخی سیاسی و ئابووری وڵات دەبێت و لەبارەی دۆخی کۆمەڵایەتی و کلتوریی کۆمەڵگەی عێراقی بەرچاوڕوونی زیاتر دەخاتە بەردەم بڕیار بەدەستدانی وڵات.