دەستەی دادوەریی هەڵبژاردنەکانی عێراق سەرجەم تانەکانی ڕەتکردەوە

ئاڤا نیوز

 

دەستەی دادوەریی هەڵبژاردنەکانی عێراق سەرجەم ئەو تانانەی لە ئەنجامی هەڵبژاردنی خوولی شەشەمی پەرلەمان درابوون، بە ڕەتکردنەوە یەکلاکردەوە.

 

وێنە گەورەکە: دواى ڕاگەیاندنی ئەنجامی فەرمیی هەڵبژاردنی خولی شەشەمی پەرلەمانی کوردستان، 41 تانە لە ئەنجامی هەڵبژاردن لەلایەن لایەنە سیاسی و کاندیدەکانەوە پێشکەش بە کۆمیسیۆن کرابوون، کۆمیسیۆنیش تانەکانی ڕەوانەی دەستەی دادوەریی هەڵبژاردن کردبوو بۆ ئەوەی یەکلاییان بکاتەوە.

 

نووسراوی فەرمی: بەپێی نووسراوێکی فەرمی دەستەی دادوەریی هەڵبژاردنەکانی عێراق کە واژۆی دادوەر حەسەن فوئاد، سەرۆکی دەستەکەی لەسەرەو ئاراستەی کۆمیسیۆنی باڵای هەڵبژاردنەکان کردووە، ڕایدەگەیێنێت: سەرجەم تانەکان لە ماوەی یاسایی خۆی لەسەر هەڵبژاردنی خولی شەشەمی پەلەمانی کوردستان یەکلا کرانەوە.

 

لێدوانی فەرمی: جومانە غەلای، گوتەبێژی کۆمیسیۆنی باڵای هەڵبژاردنەکانی عێراق بە ئاڤا نیوزی ڕایگەیاند: "دەستەی دادوەریی هەڵبژاردنەکانی عێراق سەرجەم تانەکانی لەبارەی هەڵبژاردنی خولی شەشەمی پەرلەمانی کوردستان بە ڕەتکردنەوە یەکلاکردەوە".

 

ئەوەی پێویستە بیزانیت: دوای یەکلاکردنەوەی سەرجەم تانەکان لەلایەن دەستەی دادوەریی هەڵبژاردنەوە، کۆمیسیۆن ئەنجامە فەرمییەکانی هەڵبژاردنی پەرلەمانی کوردستان پەسەند دەکات.