سەرۆکوەزیرانی عێراق سوپاسی هەرێمی کوردستان دەکات

ئاڤا نیوز 

 

سەرۆکوەزیرانی عێراق داوا لە هاووڵاتییان دەکات هاوکاربی تیمەکانی سەرژمێری و پابەندبن بە قەدەغەی هاتووچۆ بن، هاوکات سوپاسی ڕۆڵی دەستەی ئامار و وەزارەتی پلاندانانی حکومەتی هەرێمی کوردستانی دەکات.

 

وێنە گەورەکە: پرۆسەی سەرژمێری گشتی لە هەرێمی كوردستان و عێراق دەستیپێکردووە، تیمەكانی ئامار و سەرژمێری لە 20 و 21ـی مانگ سەردانی ماڵان دەكەن و فۆرمێكی تایبەت پڕدەكەنەوە کە چەندین پرسیاری جۆراوجۆر لەخۆدەگرێت، یەکەمجاریشە لە عێراق و هەرێمی کوردستان سەرژمێری دانیشتووان بەشێوەی ئۆنڵاین و تەکنەلۆژیای پێشکەوتووەوە دەکرێت.

 

ڕاگەیێنراوی فەرمی: محەممەد شیاع سوودانی، سەرۆکوەزیرانی عێراق ڕایگەیاند: بۆ ئەوەی ئەم پرۆسە جیاوازە سەرکەوتوو بێت، داوا لە هاووڵاتییان دەکەین هاوکاربن لەگەڵ تیمەکانی ئەنجامدانی سەرژمێری و زانیاریی ڕاست پێشکەش بکەن لەپێناو مسۆگەرکردنی مافەکانی خوێندن، کار، خزمەتگوزاری و تەندروستی و تەواو بوارەکانی دیکەی گەشەپێدان.

 

سوودانی گوتیشی: ڕۆڵی وەزارەتی پلاندانان و دەستەی ئاماری فیدراڵی  و هەموو وەزارەتەکان و لایەنە ناحکومییەکان و پارێزگاکان و وەزارەتی پلاندانان لە حکومەتی هەرێمی کوردستانی عێراق و دەستەی ئامار لە هەرێم بەرز دەنرخێنین و سوپاسی سندووقی دانیشتووانی نەتەوە یەکگرتووەکان دەکەم لە بەرامبەر پشتیوانی و هاوکاری لە هەموو قۆناغەکاندا.

 

لەلایەکی دیکەوە: سوودانی دەڵێت، گرنگە گوێ بەو دەنگۆیانە نەدرێن کە سەرژمێری لە ئامانجە گەشەپێدانەکانی دوور دەخاتەوە، بە بەستنەوەی بە بابەتەکانی پەیوەست بە باج یان پاراستنی کۆمەڵایەتی و ئەمەش لە ڕاستییدا هیچ بنەمایەکی نییە، بەو پێیەی سەرژمێری پایەی گەشەپێدان و پێشکەوتن و پێشخستنی کارگێڕی و خزمەتگوزارییە.