بەقاچاغبردنی زێڕ لە ڕێگەی فڕۆکەخانەکانەوە گەیشتە کەرکووکیش

ئاڤا نیوز

 

هێزە ئەمنییەکانی کەرکووک تۆڕێکی تایبەتمەند بە بەقاچاغبردنی زێڕ لە باشووری پارێزگاکە دەستگیر دەکەن لەو کاتەی کە ویستوویانە کارەکە ئەنجام بدەن.

 

وێنە گەورەکە: ڕۆژی یەکشەممە 17-11-2024 لە یەکێک لە فڕۆكەكانی هێڵی عێراقییە و لە فڕۆکەخانەی بەغدا، 13 کیلۆ زێڕ بە یاریدەدەری فڕۆکەوانەکە گیرا کە بەنیازبوو بەرەو تورکیا بیبات.

 

زانیایی بەدەستهاتوو: سەرچاوەیەکی ئەمنی لە پارێزگای کەرکووک ئەوەی بۆ میدیای عێراق ئاشکرا کردووە، دوای دانانەوەی بۆسەیەک لەلایەن هێزە ئەمنییەکان لەگەڵ نووسینگەی لێکۆڵینەوەی کەرکووک لە دەستەی دەستپاکی بۆ چەند کەسێکی تایبەتمەند بە بەقاچاغبردنی قاڵبی زێڕ لەڕێگەی فڕۆکەخانەکانەوە، توانیان سێ کەس دەستگیر بکەن.

 

زانیاریی زیاتر: بە گوتەی سەرچاوەکە، ئەو کەسانەی دەستگیرکراون بەشێکن لەو تۆڕەی کە کاریان بەقاچاغبردنی قاڵبی زێڕە لە ڕێگەی فڕۆکەخانە و بازگەکانەوە. ئەو کەسانەش لە کاتی ئەنجامدانی کارەکە لە یەکێک لە خاڵەکانی پشکنین لە نزیک ناحیەی تازە خورماتوو دەستگیرکراون.

 

لێدوانی فەرمی: لەسەر بەقاچاغبردنی زێڕ لە فڕۆکەخانەی نێودەوڵەتیی بەغدا، دەستەی دەستپاکیی عێراق ڕایگەیاندووە، فەرمانی دەستگیرکردن بۆ چوار کەس دەرچووە.