فوئاد حوسێن: ئیسرائیل بە نووسراو  پەیامی هەڕەشەئامێز بۆ عێراق دەنێرێت

ئاڤا نیوز

 

وەزیری دەرەوەی عێراق نیگەرانیی خۆی لە دۆخی ناوچەکە و عێراق دەربڕی و ئاماژەی بەوە کرد کە حکومەتی ئیسرائیل بە ڕوونی هەڕەشەی هێرشکردنە سەر عێراقی لە حکومەت کردووە.

 

وێنە گەورەکە: ئەمڕۆ هەینی پێنجەمین کۆڕبەندی ئاشتی و ئاسایشی ڕۆژهەڵاتی ناوەڕاست "مێپس-2024" لە شاری دهۆك دەستیپێکرد و دوو ڕۆژ دەخایەنێت، تەوەری سەرەكی كۆڕبەندەكەش؛ ناكۆكییەكانی ناوچەكە و میکانیزمەکانی ڕێگریكردنە لە فراوانبوونی گرژییەكان.

 

ڕاگەیێنراوی فەرمی: فوئاد حوسێن، وەزیری دەرەوەی عێراق لە میانەی پانێڵێکدا لە کۆڕبەندەکە ڕایگەیاند: پێشتر لە ڕاگەیاندنەکان باسی هێرشی ئیسرائیل بۆ سەر عێراق دەکرا، دوای ئەوە پەیامی زارەکی و نووسراوی حکومەتی نەتانیاهۆمان پێگەیشت کە پەیامی هەڕەشە بوون، دواتریش وەزیری دەرەوەی ئیسرائیل پەیامێکی ئاراستەی ئەمینداری گشتیی نەتەوە یەکگرتووەکان و ئەنجوومەنی ئاسایش کرد کە باس لە هەڕەشەکانی سەر ئیسرائیل دەکات و تێیدا هاتووە "ئیسرائیل بە مافی خۆی دەزانێت بەرگری لە خۆی بکات"، ئەمە واتە هەنگاوی سەرەتایی هەیە بۆ هێرشکردنە سەر عێراق.

 

لەلایەکی دیکەوە: فوئاد حوسێن ئاماژەی بەوە کرد، حکومەت هەنگاوی ناوخۆیی و دەرەکیی دەربارەی هەڕەشەکانی ئیسرائیل گرتووەتەبەر و دووپاتی کردەوە عێراق جەنگی ناوێت و حکومەتی عێراق بەردەوامە لە پەیوەندییەکانی لەگەڵ وڵاتە کاریگەرەکانی خۆرئاوا بۆ ڕێگریکردن لە هێرشکردنە سەر عێراق.